Ўзбекистон президенти ҳузуридаги Давлат бошқаруви академияси давлат идораларида ишлайдиган ходим ва раҳбарлар учун бюрократияни бартараф қилиш бўйича курслар уюштириш бўйича топшириқ олди. Ўқиш пуллик бўлиб, унда қатнашиш мажбурийдир. Бу ҳақда Ўзбекистон президенти Шавкат Мирзиёев томонидан 9 декабрда имзоланган қарорда айтилади.
“Ўтказилган таҳлиллар вазирликлар, идоралар, маҳаллий ижро этувчи ҳокимият органлари, бошқа давлат ташкилотларида эскирган бюрократик усулларда иш юритиш, шу жумладан, ҳужжатлар айланмасига замонавий ахборот технологияларини жорий қилиш даражасининг пастлиги, қоғозбозлик ҳажмининг юқорилиги, шунингдек, амалий аҳамиятга эга бўлмаган кўплаб йиғилиш ва мажлислар ўтказиш амалиёти сақланиб қолаётганлигини кўрсатди”, дейилади қарорда.
Курс ўқув дастурини ишлаб чиқиш учун академияга икки ой муҳлат берилган. Курсларда давлат идоралари ходимларига вақтни тўғри ташкил этиш ва ундан фойдаланиш самарадорлигини ошириш технологиялари (time management), бюрократия, қоғозбозлик ва йиғилишлар ўтказиш амалиётини бекор қилиш бўйича сабоқ берилади.
Академия ва унинг филиалларидаги ўқув курсларида ўқиш билан боғлиқ харажатлар, қарорга мувофиқ, бюджетдан ташқари маблағлар ва қонун ҳужжатлари билан тақиқланмаган бошқа маблағлар, шунингдек, ходимлари курс тингловчилари ҳисобланган давлат органлари ва ташкилотларининг маблағлари ҳисобидан қопланиши кўзда тутилган.