Япон матбуотининг ëзишича¸ Токио ҳукумати электр энергияси ишлаб чиқариш ва боғдорчилик маҳсулотлари экспортини кенгайтириш мақсадларида сарфлаш учун Ўзбекистон ҳукуматига 1.7 миллиард доллар қарз беради.
Президент Шавкат Мирзиëевнинг Токиога қилган сафари давомидаги музокараларда Япония Бош вазири Синдзо Абэ шундай ваъда берган.
Япон матбуотига кўра¸ Тошкент ҳукумати бу қарзни мамлакатдаги электр тақчиллиги муаммосини ҳал қилишга қаратилган лойиҳаларга ишлатиш мажбуриятини олган. Шунингдек¸ японлар берадиган маблағ экспортни қўллаб-қувватлаш учун боғдорчилик фермерларига кредит ажратишга ҳам сарфланиши лозим.
Пайшанба куни икки давлат раҳбари Ўзбекистон билан Япония ўртасидаги стратегик шериклик муносабатларини янада чуқурлаштириш ва кенгайтириш тўғрисидаги Қўшма баёнотни имзолади.
Токио учрашувларида Мирзиëев Ўзбекистонда эркин бозор ва хориж инвестицияси учун қулай иқлим яратиш ҳақида кўп гапирган.
Мирзиëев ҳокимиятга келгандан сўнг Ўзбекистон ташқи қарзи кескин ошиб бормоқда.
Ўзбекистон Марказий банки эълон қилган рақамларга кўра¸ 2019 йил 1 июлга қадар мамлакат ташқи қарзи 20.7 миллиард долларга етган.
Олинаëтган катта қарзларнинг ишлаб чиқариш объектлари яратиш, сурункали энергетик муаммолар ечимини топишдан кўра кўпроқ катта қурилиш лойиҳалари¸ хусусан¸ Tashkent City каби ҳашаматли ситиларга сарфланаëтгани жамоатчилик ва иқтисодчилар танқидига учрамоқда.