Ўзбекистонда врачлар "сўнгги икки йилда 277 мингта ҳолатда гипс қилиш учун тиббиёт гипси ўрнига 351 тонна қурилиш гипсидан фойдаланилган. Хусусан, Фарғонада 30, Бухорода 33, Тошкент вилоятида 35, Наманганда 36, Қашқадарёда 38, Самарқандда 43 ва Тошкент шаҳрида 48 тонна қурилиш гипсидан фойдаланилган.
Бу ҳақда Коррупцияга қарши курашиш бўйича Республика идоралараро комиссиясининг соғлиқни сақлаш тизимида йўл қўйилаётган хато ва камчиликларга бағишланган йиғилишида айтилгани тўғрисида ЎзА хабар қилди.
Қурилиш гипсини қўллаш беморларда жароҳат олган суякнинг силжиши, гипс қўйилган соҳа терисининг шилиниши, тери аллергияси каби салбий оқибатларни келтириб чиқаради.
Йиғилишда нима учун бундай ҳолатга йўл қўйилгани сўралганда мутасаддилар Ўзбекистонда тиббиёт гипси ишлаб чиқарилмаслигини маълум қилгани, аммо республикада тиббий гипс ишлаб чиқарувчи биронта корхона ташкил этиш ҳақида ўйлаб кўрилмаган ёки вазирлик шундай ташаббус билан чиқмагани хабар қилинди.