Бугун, 12 февраль куни маҳаллий вақт билан соат 11.00 да жиноят ишлари бўйича Қуйичирчиқ туман суди биносида Аҳмад Турсунбоевга (Аҳмадбой) оид жиноят иши бўйича суд жараёни якунланиб, суд ҳукми эълон қилиниши кутилмоқда, дея хабар қилади маҳаллий нашр.
Мазкур туман судида А.Турсунбоев ва яна 15 кишининг иши кўрилаётгани ҳақида Озодлик аввал хабар қилган.
Бунгача “Аҳмадбой иши” бўйича учта маҳкама ўтказилган. 2018 йил февралидаги дастлабки суд ҳукмига биноан А.Турсунбоев 13 йилга қамалган. Шунингдек, у энг кам иш ҳақининг 400 баравари миқдорида жаримага тортилган. Май ойида бўлиб ўтган иккинчи судда эса у 10 йилга озодликдан маҳрум этилган. Кейинги судда унга 9 йиллик қамоқ жазоси тайинланган.