Россиянинг Волгорад шаҳрида ўқийдиган Жасурбек Ражабов Волга дарёсида чўкиб кетаётган америкалик ота-болани қутқаргани учун медаль билан тақдирланди. Бу ҳақда V1.Ru сайти хабар қилади.
22 ёшли Ражабов Волгоград Давлат аграр университетида қутқарувчи мутахассислиги бўйича ўқийди. Ўтган йили ёзги амалиётни у Волгоград вилоятининг Данилов туманидаги Бобри қишлоғида жойлашган пляжда ўтказган. Амалиёт кунларининг бирида у ёрдам ҳайқириғини эшитиб, чўкаётган одамлар ёнига сузиб борган.
Жасурнинг айтишича, у чуқурлиги уч метрча келадиган сувда сузишни умуман билмайдиган 7 ёшли болакай ва саросимага тушган отасига йўлиққан. Даставвал у болани, кейин эса отани қутқарган.
Қутқарилганлар АҚШнинг Филадельфия штатидан бўлганини Ж.Ражабов “Чўкаётганларни қутқаргани учун” медалини олганидан кейин билган.
Бу Жасурнинг Волгоградда олган иккинчи мукофотидир. Биринчи медалини у бир онага беш яшар фарзандини топиб берганидан кейин олган.
Ж. Ражабов ўз жасорати ҳақида Ўзбекистонда қолган онасига ҳам, яқинларига ҳам айтган эмас, курсдошлари эса бу ҳақда телеянгиликлар орқали хабар топишган. Журналистлардан ўзини қаҳрамон деб атамасликни сўраган талаба отаси унга жасорати билан мақтанмасликни таълим берганини айтган.
Жасур ўқишни битирганидан кейин Россияда ўзига иш топмоқчи, агар бунга муваффақ бўлолмаса, Ўзбекистонга қайтиб, ўт ўчирувчи бўлиб ишламоқчи.