Президент Шавкат Мирзиёев “ҳудудлар ривожи, аҳоли ҳаёти билан яқиндан танишиш мақсадида” 12 март куни Хоразмга борди.
Президент матбуот хизматининг билдиришича¸ Мирзиëев 2017 йили ўз қарори билан очилган “Ҳазорасп” эркин иқтисодий зонасидаги “Develop Textile” корхонаси фаолияти билан танишган.
Расмий хабарда ëзилишича¸ “Ҳазорасп” эркин иқтисодий зонасига жами 306 миллион долларлик 19 та лойиҳа жалб этилган¸ 1100 дан зиёд киши иш билан таъминланган¸ сармояларнинг 266 миллион доллардан ортиғи тўғридан-тўғри хорижий инвестициялардир.
Президент борган “Develop Textile” МЧЖ¸ матбуот хизматига кўра¸ 13 миллион доллар инвестиция ëтқизилган хориж корхонаси ва у 760 одамни иш билан таъминлаган.
Президентнинг Хоразм сафари кун тартибига оид бошқа тафсилотлар ҳозирча расман эълон қилинмади.
Мирзиëев сафари арафасида хоразмликлардан келган хабарларга кўра¸ вилоятнинг президент сафари доирасига киритилган ҳудудларида йўлларни зудлик билан асфальт қилиш ва ободонлаштириш ишлари амалга оширилган.