Ўзбекистонда барча таълим муассасалари ёпилганидан кейин талаба ва ўқувчиларни ўз вилоятларига етказиб қўйиш учун Тошкент автовокзали туну-кун ишлай бошлади. Бу ҳақда Транспорт вазирлиги ўз Телеграм-канали орқали маълумот тарқатди.
“Хусусан, “Тошкент” автовокзалидан кунига шаҳарлараро 17 та йўналиш бўйича 35 та қатнов орқали 1800 нафар йўловчи ташилган бўлса, йўловчилар оқимининг бирдан ортиши сабаб бугуннинг ўзида “Uzautotrans service” корохонаси яна қўшимча 35 та қатновни йўлга қўйди. Жами 70 та қатнов орқали ҳозирда 4000 га яқин йўловчиларга хизмат кўрсатилмоқда”, дейилади хабарномада.
Вазирлик йўловчилар оқимидан келиб чиққан ҳолда “Тошкент” автовокзалидан шаҳарлараро йўналишларда яна қўшимча автобуслар қатнови жорий этилиши мумкинлигини билдирган.
Ўзбекистонда коронавирусга чалинган илк бемор аниқланиши ортидан 16 мартдан мамлакатдаги барча таълим муассасаларида таътил эълон қилингани ҳақида Озодлик аввал хабар қилганди.