“Маърифат” газетаси мухбири Шарифа Мадраҳимованинг журналистик фаолиятига тўсқинлик қилган Учкўприк туман ҳокимлиги ходими Шоҳжаҳон Мўйдинов ишдан бўшатилди. Бу ҳақда Учкўприк тумани ҳокимлиги ахборот хизмати маълум қилади.
Хабарномада журналист аёл ва ҳокимлик ходими ўртасида юз берган ҳолат туман ҳуқуқ-тартибот идоралари томонидан ўрганилаётгани қайд этилади.
Шарифа Мадраҳимованинг ўзи аввалроқ Озодликка айтишича, 21 апрель куни Учкўприк туманида озиқ-овқат маҳсулотлари ярмаркасини ëритиш учун борганида ўзини “туман ҳокимининг котиби” деб танитган Шоҳжаҳон Мўйдинов унинг қўлини қайириб, куч ишлатиб телефонини тортиб олган. Шундан сўнг журналистнинг шахсини аниқлаш учун уни туман ИИБга олиб кетишган ва 2 соат ушлаб туришган.
Ҳокимлик вакили ўшанда Озодликка воқеанинг англашилмовчилик оқибатида юз бергани, Шарифа Мадраҳимова эса етук журналист сифатида ҳурмат ва эътиборга лойиқлигини айтганди.