Коронавирус юқтириб олгани тасдиқланган ангренлик Ф. 24 апрель куни ҳаётдан кўз юмган. Бу ҳақда Соғлиқни сақлаш вазирлиги жамоатчилик билан алоқалар бўлими маълумот тарқатди.
Қайд этилишича, бемор 19 апрель куни Тошкент вилоят юқумли касалликлар шифохонасига ўта оғир аҳволда ётқизилган ва сунъий нафас олиш аппаратига ҳам олинган.
Коронавирус инфекцияси ҳам аниқланган бу аёл ихтисослашган тиббий ёрдам кўрсатиш мақсадида Тошкент тиббиёт академиясининг кўп тармоқли тиббиёт клиникасига ўтказилган.
“Беморда ўпканинг сурункали обструктив касаллиги, икки томонлама бронхопневмония, ўткир респиратор дистресс синдром, гипертония касаллиги иккинчи босқич, хавф 4, семизликнинг 3 даражаси бўлганлиги сабабли касаллик оғир кечиб, даволаниш давомида ҳамиша сунъий нафас олиш аппаратида бўлган”, дейилади ССВ хабарномасида.
Вазирлик мутахассисларининг белгиланган стандартлар асосида ўтказган реанимацион муолажаларига қарамасдан бемор ўткир респиратор дистресс синдроми, ўткир нафас, ўпка-юрак ва полиорган етишмовчилигидан вафот этган.
Шу тариқа Ўзбекистонда коронавирусга чалингани ортидан оламдан ўтганлар сони 8 нафарга етди.
Айни пайтда мамлакатда коронавирус юқтириб олганлар сони 1758 нафарга етган, 598 киши соғайиб кетган.