Карантин бошлангандан буён, 27 апрель ҳолатига кўра, Давлат инспекцияси, ИИВ, Миллий гвардия ходимлари томонидан ниқоб тақмаган ва карантин режимини бузган, санитария ва гигиена қоидаларига риоя қилмаган 71 028 кишига баённома тузилган ва улар 45,8 миллиард сўм (тақрибан 4,5 миллион АҚШ доллари) жаримага тортилган. Бу ҳақда Санитария-эпидемиология назорати давлат инспекцияси раҳбари Нурмат Отабеков 29 апрель куни АОКА штабида ўтказилган брифингда билдирган.
Отабековга кўра, мазкур маблағдан 14 миллиард сўми (тақрибан 1,4 миллион доллар) ундирилган, келиб тушган маблағнинг ярми давлат бюджетига йўналтирилган, қолган ярми эса Ички ишлар вазирлиги бюджетига тушган.
Ўзбекистон бош санитарининг қайд этишича, санитария қоидалари ва нормалари, шунингдек, гигиена нормаларини бузиш тўғрисидаги баённомалар Маъмурий жавобгарлик тўғрисдаги Кодекснинг 54-моддаси ("Эпидемияга қарши курашиш қоидаларини бузиш") асосида тузилади.