БМТнинг Қочқинлар иши бўйича Олий комиссарлиги Ўзбекистонда фуқароликка оид янги қонун қабул қилинганини олқишлади. Олий комиссарликнинг билдиришича, мазкур қонун Ўзбекистонда яшаётган, аммо фуқароликка эга бўлмаган камида 50 минг кишига фуқаролик берилиши учун имконият яратади.
Euronews телеканалига интервью берган БМТнинг Қочинлар иши бўйича Олий комиссарлиги матбуот котиби Шабия Манту “Ўзбекистоннинг бу қадами жуда узоқ кутилган эди”, деб айтди.
Унга кўра, мазкур қонун қабул қилингани ортидан фуқаролиги мавжуд бўлмаган шахслар овоз бериш, ишлаш ва саёҳат қилиш ҳуқуқларига эга бўлади.
Бундан бир ой аввал кучга кирган янги қонунга асосан Ўзбекистонда 1995 йилнинг 1 январига қадар доимий яшаш ҳуқуқига эга бўлган фуқаролиги йўқ шахсларга фуқаролик берилади.
БМТ мутахассисларига кўра, Ўзбекистонда фуқаролиги йўқ бўлган 97 минг одам яшайди.
Ўзбекистон президенти 24 январь куни парламентда қилган йиллик мурожаатида “фуқаролик масалаларига оид қонунчиликни такомиллаштириш орқали инсон ҳуқуқларини таъминлаш” зарурати ҳақида гапирган эди.
“1995 йилгача Ўзбекистонга келган ва шундан буён истиқомат қилаётган шахсларга Ўзбекистон Республикаси фуқаролиги автоматик тарзда берилиши даркор”, деган эди ўшанда президент.
СССР тарқаганидан сўнг Ўзбекистонга кўчиб келган¸ хусусан¸ Тожикистондаги фуқаролик урушидан қочган ўн минглаб ўзбеклар Ўзбекистонда муқим яшаб келаëтганига қарамай улар ҳозирга қадар “фуқаролиги йўқ шахс” мақомида қолмоқда.