Жорий йил апрель ойининг сўнгги ўн кунлигида жисмоний шахслар томонидан банкларга сотилган валюта маблағларининг кунлик ўртача ҳажми биринчи ва иккинчи декадалардаги ўртача кунлик ҳажмларга нисбатан 2,5 баробар ўсиб, 9 миллион 600 минг АҚШ долларини ташкил этди (биринчи ва иккинчи декадаларда - 3,8 млн. АҚШ доллари). Бу ҳақда Ўзбекистон Марказий банки томонидан 7 май куни эълон қилинган “Ички валюта бозори бўйича қисқача шарҳ”да айтилади.
МБ изоҳига кўра, апрель ойи давомида халқаро пул ўтказмаларидан жами 250 миллион АҚШ доллари келиб тушган, бу эса март ойидаги кўрсаткичга нисбатан 15 фоизга камдир. Бунда ойнинг охирги ўн кунлигида халқаро пул ўтказмаларининг ўртача кунлик ҳажми ойнинг биринчи ва иккинчи декадаларига нисбатан 1,7 баробарга (6 миллион 700 минг АҚШ долларидан 11 миллион 500 минг АҚШ долларига) ошиши кузатилган .