Ўзбекистон Олий Мажлиси Сенати раиси Танзила Норбоева 11 май куни Сенатнинг ялпи мажлисида Инсон ҳуқуқлари бўйича вакили (омбудсман) Улуғбек Муҳаммадиевнинг ҳисоботи тингланганидан кейин Омбудсман институти фаолиятини танқид қилди.
“Ўтган йилда Омбудсманга 12 800 дан зиёд мурожаат келиб тушган. Лекин уларнинг қанчаси ёки неча фоизи ижобий ҳал қилинган деган саволга аниқ жавоб топа олмадим. Бор-йўғи 20 фоиз мурожаат назоратга олинган, холос”, деган Т.Норбоева бунинг жуда ҳам паст кўрсаткич эканини айтиб, мурожаатларнинг аксариятини назоратга олиш лозимлигини урғулаган.
Сенат раисига кўра, Ўзбекистонда Омбудсман институтини тубдан ислоҳ қилиш лозим. Т. Норбоева ҳозирда мамлакатда инсон ҳуқуқлари бузилаётганига оид ҳолатларни депутатлар журналисту блогерлар ҳамда ижтимоий тармоқлар орқали ўрганаётганини, ваҳоланки, буни парламентнинг ўз вакили бўлган омбудсман орқали ўрганиш мақсадга мувофиқ бўлишини таъкидлаган.