Жорий йил 13 май куни соат 06:00 дан эътиборан Самарқанд шаҳри бўйлаб карантин қоидалари кучайтирилади. Бу ҳақда Самарқанд шаҳар ҳокими Бобурмирзо Облоқулов 12 май куни шаҳар прокурори ва ИИБ бошлиғи иштирокида ўтказилган онлайн брифинг чоғида маълум қилди.
Шаҳар ҳокимига кўра, чоршанба тонгидан бошлаб Самарқандда транспорт воситаларининг белгиланган рухсатномасиз (стикерсиз) ҳаракатланиши тақиқланган. Шаҳарда фақат озиқ-овқат дўконларию бозорлари ҳамда дорихоналар фаолиятига рухсат берилиб, қолган хизмат турлари чекланган. Бу муассасалар олдига ҳам харидор билан ишлаш бўйича қатъий талаблар (дезинфекция воситалари, мижозни ниқоб ва қўлқоп билан таъминлаш каби) қўйилган.
Облоқулов Самарқанд шаҳрига киришда ўрнатилган 25 та блокпост фаолияти ҳам кучайтирилишини айтган.
Ҳоким карантин қоидаларига амал қилмаган ташкилот раҳбарлари жавобгарликка тортилишидан ҳам огоҳлантирган. Айни пайтда у чораларнинг нима сабабдан кучайтирилаётганига аниқлик киритмаган.
Эслатиб ўтамиз, Республика махсус комиссияси карантин чекловлари даражаси бўйича Самарқанд шаҳри ва вилояти қизил ҳудудга киритилган.