Олий Мажлис юқори палатасининг 19 июнь куни бўлиб ўтган ялпи мажлисида сенаторлар қонунчиликка кучли таъсир қилувчи дори воситаларини ноқонуний сотганлик учун жиноий жавобгарлик жорий этишни кўзда тутувчи ўзгартишларни маъқулладилар. Бу ҳақда Сенат ахборот хизмати маълум қилди.
Қайд этилишича, бу борада Ўзбекистон Жиноят кодексининг сифатсиз ёки қалбакилаштирилган дори воситалари айланиши билан боғлиқ ноқонуний хатти-ҳаракатлар учун жавобгарлик кўрсатилган моддасига қўшимча киритилмоқда. Яъни таркибида кучли таъсир қилувчи моддалар мавжуд бўлган дори воситаларини рецепт бўйича чакана реализация қилиш тартибини бузганлик учун алоҳида жавобгарлик белгиланяпти.
Ўзгартишларга мувофиқ, бу каби жиноятни содир этганликда айбдор деб топилган шахс беш йилгача озодликдан маҳрум қилиниши мумкин.
Қонун мамлакат президенти томонидан имзоланганидан кейин кучга киради.
Амалдаги қонунчиликка кўра, “дорихона бангфурушлиги” билан шуғулланган кишилар маъмурий жавобгарликка тортилиб, уларга Маъмурий жавобгарлик тўғрисидаги кодекснинг 164-моддаси (Савдо ёки хизмат кўрсатиш қоидаларини бузиш) билан базавий ҳисоблаш миқдорининг бир бараваридан саксон бараваригача миқдорда жарима солиниши мумкин.
Ўзбекистондаги дорихоналарда “Лирика”, “Трамадол” ва шу каби психотроп дориларнинг ноқонуний савдоси кенг қулоч ёйгани ҳақида Озодлик аввал бир неча бор хабар қилган.