Ўзбекистонда чет элликларга ўзбек тилини ўргатишга мўлжалланган “Ўзбекона” дарслиги чоп этилди. Бу ҳақда Олий ва ўрта махсус таълим вазирлиги ўз расмий Телеграм-канали орқали маълумот тарқатди.
Қайд этилишича, мазкур дарслик хорижий тилни эгаллашнинг умумевропа компетенциялари тизимига асосан A1 даражани эгаллаш имконини берувчи дарслик бўлиб, у 9 та бўлим, 3 та назорат блоки, аудиолар ва қўшимча материаллар каби қисмлардан иборат.
“Китобда шу пайтгача мавжуд қўлланма ва электрон ресурслардан фарқли равишда мавзулар тизимли ва изчил ёритилган, интегратив ва коммуникатив методлар уйғунлаштирилган, воситачи тилдан фойдаланилмаган”, дейилади вазирлик хабарномасида.
Дарслик хорижий тил ўқитишнинг ўқиб тушуниш, тинглаб тушуниш, гапириш, ёзиш кўникмаларини тўлақонли қамраб олган.