“26 июль куни Тўрткўл туман милиция таянч пунктидан кома ҳолатида касалхонага олиб келинган 39 яшар Илҳомбой Саъдуллаев 11 август куни ўлди”.
Озодлик радиосида 18 август куни эълон қилинган бу мақолада келтирилган фактларни Бош прокуратура матбуот хизмати Xabar.uz нашрига тасдиқлади.
“Ижтимоий тармоқларда Қорақалпоғистоннинг Тўрткўл туманида истиқомат қилган фуқаро Ички ишлар органи ходимлари олиб кетганидан сўнг сирли равишда комага тушгани ва орадан 13 кун ўтиб, вафот этганига оид хабарлар тарқалди. Тўрткўлда ростан ҳам шундай ҳолат юз берганини Бош прокуратура матбуот хизмати тасдиқлади”, - деб хабар берди Xabar.uz 19 август куни.
Ўзбекистон Бош прокуратураси сайтида бу борадаги хабар эълон қилинмаган. Xabar.uz мухбири Бош прокуратурага мурожаат қилгани ортидан ахборот хизмати бу хабарни тасдиқлаганини билдирган.
18 август куни Тўрткўл туман прокуратураси Илҳомбой Саъдуллаевнинг ўлими юзасидан терговолди суриштируви ўтказаётганини Озодликка тасдиқлаганди.
Саъдуллаевнинг турмуш ўртоғи Чамангул Ҳажиева Озодлик билан суҳбатда эри Тўрткўл туман Ибн Сино маҳалласи милиция таянч пунктига 26 июль куни соппа-соғ олиб кетилгани, милиция бўлимида уни калтаклаб, кома ҳолатига туширишганини иддао қилган.
Қорақалпоғистон республикаси Тўрткўл туман касалхонасининг Жонлантириш бўлими бошлиғи Абдурасул Ражаббоев беморнинг бош мия ёпиқ жароҳати туфайли ҳаётдан кўз юмганини билдирди.
Бош прокуратуранинг Xabar.uz нашрига билдиришича: “ И.С. касалхонага олиб келинишидан бир кун аввал — 26 июль куни соат тахминан 16:00 ларда маст ҳолатда ўз уйида турмуш ўртоғи Ч.Х. билан жанжал қилган. Жанжал хабари профилактика инспекторига етиб боргач, икки нафар ИИБ ходими И.С.ни Spark’да таянч пунктига олиб келган. Ўша жойда И.С.нинг мазаси қочган ва ИИБ ходимлари бу ҳақда унинг турмуш ўртоғига маълум қилган. Аёл келиб, турмуш ўртоғини (бу пайтда у ҳушида бўлмаган) уйига олиб кетган. И.С. эртаси куни ҳам ўзига келмагач, у туман тиббиёт бирлашмасига олиб борилган”.
Мазкур воқеани тергов қилиш учун ҳозирда Қорақалпоғистон Республикаси прокуратураси ходимларидан иборат махсус гуруҳ тузилган. Ҳолат юзасидан қўшимча маълумот берилиши маълум қилинган.