Жорий йилнинг 5 сентябридан Ўзбекистонда диний ташкилотларда жамоавий ибодатларни (жума ва шанба-якшанбалик диний хизматлар) амалга оширишга изн берилади. Бу ҳақда Республика махсус комиссиясининг галдаги қарорида айтилган.
Кейинроқ махсус комиссия аъзоси, бош вазир ўринбосари Азиз Абдуҳакимов Kun.uz нашрига берган суҳбатида жума намозларини 4 сентябрдан, яъни шу ҳафтадан бошлаб амалга ошириш мумкин бўлишини билдирган.
Махсус комиссия қарорига мувофиқ, диний объектларда жамоавий ибодатларни амалга ошириш чоғида қуйидаги қоидаларга риоя этилиши лозим:
- жамоавий ибодатни ўтказиш учун ташриф буюрувчилар ўртасида ижтимоий масофани таъминлаш;
- диний ташкилотлар ходимлари ва ташриф буюрувчиларнинг тиббий ниқобда бўлиши;
- санитария-гигиена ва дезинфекция талабларига қатъий риоя этиш, бино хоналарни доимий равишда дезинфекция қилиш, уларга кириш-чиқиш жойларини пирометрлар, антисептик воситалар ва дезинфекцион “тўшак”лар билан жиҳозлаш;
- ҳар бир диний ибодатдан кейин бино (хона) ва ундаги жиҳозларнинг юза қисмини дезинфекцион воситалар билан тозалаш;
- бино ва хоналарга, шунингдек, ҳаво айлантириш тизимига зарарсизлантириш анжомларини (ультрабинафша лампалар ва б.) ўрнатиш;
- тана ҳарорати 37 даража ва ундан юқори бўлган ёки инфекция аломатлари мавжуд бўлган ташриф буюрувчиларни киритмаслик;
- диний ташкилотларга кириш ва чиқиш жойларида аҳолининг тўпланишига қатъий йўл қўймаслик.
Республика махсус комиссияси қарори билан келаётган шанбадан умумий овқатланиш объектлари (ресторан, кафе, ошхона, чойхона), томоша ва маданий-кўнгилочар объектлар (фақатгина театр ва кинотеатр), парклар ва истироҳат боғларидаги аттракционлар фаолиятига ҳам рухсат берилган. Қарорда таъкидланишича, мазкур объектларга ташриф буюрганлардан ҳам қатор санитария қоидаларига риоя этиш талаб этилади.