Бугун бошланган ОТМга тест синовлари 1-сменасида 59250 нафар абитуриентнинг тест топшириши режалаштирилган эди. Бироқ улардан 3474 нафари турли сабабларга кўра тестга келмади. Бу ҳақда 2 сентябрь куни АОКАда бўлиб ўтган брифингда Давлат тест маркази директори ўринбосари Сардор Ражабов маълум қилди.
Мулозимга кўра, 1-сменадаги тестдан 37 нафар абитуриент четлатилган. Хусусан, бир абитуриент тана ҳарорати баланд бўлганлиги учун тестга киритилмаган. 8 нафар абитуриент кириш жойида тест синовларидан четлаштирилган. Улардан 4 нафари телефон, 1 нафари шпаргалка, 2 нафари бошқа абитуриент ўрнига кирмоқчи бўлган, 1 нафари ҳужжатни сохталаштиргани учун тестга қўйилмаган.
Тест синовлари жараёнларида тартиб-қоидани бузганлиги учун эса яна 29 нафар абитуриент имтиҳондан четлатилган. Улардан 26 нафари телефон ва бошқа турли электрон воситалардан фойдалангани учун, 1 нафари шпаргалка, 1 нафари калькулятор, яна бири сохта ҳужжат билан тестга киргани учун чиқариб юборилган.
Эслатиб ўтамиз, 2 сентябрдан Ўзбекистонда ОТМларга тест синовлари бошланди. Синовлар икки ҳафта (кунига икки сменадан) давом этиши кутилмоқда.