Ўзбекистон банкларида сотувга қўйилган олтин эсдалик тангалари қолгани йўқ. Марказий банк маълумотлари ана шундан далолат беради.
Spot.uz нашри кумуш эсдалик тангалари эса ўтган йил октябридаёқ сотилиб битганига эътибор қаратган.
МБ 2018 йил ноябрида 1994−2009 йилларда зарб этилган олтин ва кумуш эсдалик тангаларини сотувга қўйганди. Жумладан, сотувга 2 хил олтин (999,9 даражали, оғирлиги 31,1 грамм) ҳамда 14 хил кумуш эсдалик тангалари қўйилганди.
Аввалроқ сотувга жами 1900 дона олтин ҳамда 6900 дона кумуш эсдалик тангалари қўйилгани қайд этилганди.
Банкларда сотиладиган олтин ва кумуш эсдалик тангалари қолмаганига қарамай, Марказий банк ҳар ҳафта камида бир марта уларнинг миллий валютадаги нархларини эълон қилиб боришда давом этмоқда.