Сўнгги икки ой давомида карантин билан боғлиқ чекловларнинг юмшатилиши ҳамда иқтисодий фаолликнинг аста-секинлик билан тикланиб бориши таъсирида ички валюта бозорида хорижий валютага бўлган талабнинг нисбатан юқори даражада бўлиши кузатилган. Бу ҳақда Марказий банкнинг ички валюта бозоридаги ҳолат бўйича ахборотида айтилган.
МБ қайдича, бу асосан карантин шароитларида қондирилмаган талабнинг маълум бир кечикиш орқали юзага чиқиши билан изоҳланади.
2020 йилнинг январь-сентябрь ойлари давомида ички валюта бозорида хўжалик юритувчи субъектлар томонидан жами 10,7 миллиард долларлик хорижий валюта сотиб олинди. Мазкур даврда ички валюта бозорида хорижий валютадаги умумий таклиф ҳажми 7 миллиард долларни ташкил этиб, қолган 3,7 миллиард долларлик талаб эса МБнинг интервенциялари ҳисобига тўлиқ қондирилган.
Жорий йилнинг 9 ойи давомида жисмоний шахслар томонидан валюта айирбошлаш шохобчалари орқали сотилган чет эл валютаси миқдори 3,2 миллиард долларни ташкил этиб, айни пайтда улар томонидан 2,9 миллиард доллар сотиб олинган.
“Ҳозирги кунда жисмоний шахслар билан валюта операцияларини амалга ошириш учун тижорат банклари кассаларида нақд хорижий валюта қолдиғи 480-550 миллион доллар миқдорида бўлиши таъминланмоқда”, дейилади МБ ахборотида.
Чет эл валюталарининг миллий валютага нисбатан Марказий банк расмий курслари ҳафтада бир марта белгиланиб, душанба куни эълон қилиб борилади.
Бунда, ахборотда қайд этилишича, АҚШ долларининг сўмга нисбатан курсини белгилашда ҳафта давомида Ўзбекистон республика валюта биржасидаги кунлик банклараро савдо сессияларида мавжуд талаб ва таклиф нисбатига кўра шаклланган курсларнинг ўртача тортилган миқдоридан келиб чиқилади.
Ўзбекистонда АҚШ валютаси расмий курсининг 11 ҳафтадан бери муттасил ошиб бораётганини кузатиш мумкин.
Умуман олганда, 2020 йил 9 ойи давомида миллий валютанинг АҚШ долларига нисбатан алмашув курси 8,6 фоизга қадрсизланган.