Ички ишлар органлари Тошкент вилояти Қибрай туманидаги 9 гектар ерда пишган қулупнай даласининг пайҳон этилишига алоқадор эмас. Бу ҳақда Тошкент вилоят Ички ишлар бош бошқармаси 20 май куни хабар берди.
Билдирилишича, ички ишлар ходимлари бульдозер билан вайрон қилинган қулупнай даласига “фақатгина келиб чиққан жанжални тўхтатиш, жамоат тартибини сақлаш, хизмат бурчини бажариш” учун борган.
Қибрай туман ҳокимлиги ахборот хизмати ҳам мазкур воқеа юзасидан ўрганиш ишлари олиб борилаётганини, унинг натижалари тўғрисида қўшимча ахборот берилишини билдирди.
15 май куни Озодлик радиоси "Қибрайда ҳосилга кирган қулупнай ҳайдаб ташланди. Деҳқонлар норози" сарлавҳали мақола ва видеони эълон қилган эди.
Видеода бульдозер қулупнай даласини бузаётгани, бунга норозилик билидраётган ўнга яқин одамни эса ички ишлар ходимлари далага киритмай, йўлни тўсиб тургани акс этган.
Озодлик манбалари бу воқеа 14 май куни Қибрай туманида бўлганини, экин майдони Қибрай тумани ҳокимининг буйруғига асосан бузиб ташланганини айтишган.
Қибрай тумани ҳокимлиги расмийлари Озодликка қулупнай даласи пайҳон қилинганини тасдиқлади. Ўзини Қибрай тумани ҳокимининг ёрдамчиси деб таништирган мулозим Озодлик билан суҳбатда, деҳқонлар бу ерда рухсатсиз экинлар етиштираётгани, экинзор ўрнида сайёҳлар учун Эко Парк барпо этилишини айтган.