25 декабрь куни Тошкентдаги Renaissance Hall залида ўтган Ўзбекистон футбол ассоциациясининг навбатдан ташқари Конгрессида Одил Аҳмедов ЎФА вице-президенти ҳамда ЎФА Ижроия қўмитасининг аъзолигига сайланди. Бу ҳақда Дарё нашри хабар қилди.
Ўзбекистон футбол ассоциацияси 18 декабрь куни ўзбек футболининг таниқли вакили Одил Аҳмедов спортдаги фаолиятини якунлаганини эълон қилганди.
Шу муносабат билан Тошкентда Одил Аҳмедов ҳаёти ва ижодига бағишланган тадбир ўтказилди ва унда футболчи тўғрисида ёзилган «Орзунинг шонли йўли» китобининг тақдимоти бўлди.
1987 йилнинг 25 ноябрида Наманган шаҳрида туғилган Одил Аҳмедов футбол фаолиятини 2007 йилда Тошкентнинг «Пахтакор» клубида бошлаган. Ўшандан бери миллий терма жамоа таркибида у 108 та ўйин ўтказган ва 21 та гол уришга муваффақ бўлган.
Аҳмедов «Ўзбекистон Республикасида хизмат кўрсатган спортчи» фахрий унвони билан тақдирланган.
2018 йилда Хитойнинг «Шанхай СИПГ» жамоасида ўйнаган Одил Аҳмедов Хитой суперлигаси чемпиони бўлган.