Ўзбекистон Фанлар Академияси академиги, кимё-технология соҳасидаги таниқли олим Сайдиахрол Тўхтаев 3 январь куни 79 ёшида вафот этди.
1942 йилнинг 1 сентябрида Тошкентда туғилган Тўхтаев 1963 йилда Тошкент политехника институти ( ҳозирги Тошкент давлат техника университети)ни тамомлаган . У ўз меҳнат фаолиятини Азот саноати Республика институтининг Чирчиқ филиалидан бошлаган.
У 60 йиллик фаолияти давомида турли лавозимларда ишлади ва ўз илмий тадқиқотлари билан илмий жамоатчилик орасида танилди. Тўхтаев юзлаб илмий монографиялар ва патентларнинг муаллифи ҳисобланади.
Тўхтаев раҳбарлигида суперфосфат ва калий сульфат кимёвий ўғитларини ишлаб чиқаришнинг илмий асоси шакллантирилди. Бу ўғитлар ўзбекистон қишлоқ хўжалигининг ривожланишига катта ҳисса қўшди.
Академик Тўхтаев “Ўзбекистонда хизмат кўрсатган кашфиётчи ва рационализатор” фахрий унвони ва “Шуҳрат” медали билан мукофотланган.