Давлат солиқ қўмитаси Олий Мажлис Қонунчилик палатаси депутати Расул Кушербаев устидан Фуқаролик ишлари бўйича Шайхонтоҳур туманлараро судига даъво аризаси киритган.
ДСҚ матбуот хизматининг маълум қилишича, бунга Р. Кушербаевнинг “HUMAN UZ” ахборот порталидаги “Сўз блогерларга” кўрсатувининг жорий йил 23 февралидаги сонида айтган ҳақоратомуз сўзлари сабаб бўлган.
Қўмита депутатнинг: “...оддий солиқ қўмитасининг ходими ёки мутахассиси юк хати нима учун керак бўлишини, ҳатто у шунчалик билмайдими ё тадбиркорлар, ё одамлар шунчалик аҳмоқ деб ўйлайдимики, ўзини қилаётган ишини нотўғримаслигини исботлаши учун далил сифатида юк хатини кўрмоқчи... пасткашлик бўлса шунчалик бўладики, солиқ ходими тадбиркордан юк хатигача сўраяпти, уйидаги “туалетная бумага”ни қанақасини ишлатишини ҳам сўрамабди-да... Солиқ органлари айланиб-ўгирилиб, “тадбиркорни айбдор деб топишим керак” деган принципда ишлаяпти” деган гапларидан норози бўлган. ДСҚ вакиллари фикрича, бу билан Р. Кушербаев солиқ органлари ходимларини асоссиз айблаган ва уларнинг ишчанлик обрўсига путур етказган.
Ўз ходимларининг қайд этилган ҳолатда ҳужжат сўраш ваколати борлигини билдирган ДСҚ, мавжуд қонунчиликка кўра, депутат асоссиз иддаолари учун кечирим сўраши лозимлигини билдирган.
Қайд этилишича, жавобгар хатти-ҳаракатлари орқали солиқ органларига 4,6 миллиард сўм миқдорида маънавий зарар етказган.
“Ушбу маънавий зарар ундирилгач, “Маҳалла” хайрия жамоат фонди ҳузуридаги “Саховат ва кўмак” жамғармасига ўтказилади”, дейилган ДСҚ хабарномасида.