Сирдарё вилоят Оқолтин тумани ҳокимининг ўринбосарларидан бири пора олаётган пайтда ушлангани тўғрисида ДХХ ахборот хизмати 18 июль куни хабар берди.
Расман билдирилишича, ҳоким ўринбосари масъулияти чекланган жамият иш юритувчисини “биржа савдолари орқали ун маҳсулотлари сотиб олишига тўсқинлик қилиш, имтиёзлар бермаслик ҳамда “қора рўйхат”га киритиш билан қўрқитиб” 500 доллар талаб қилган.
Ҳоким ўринбосари пора эвазига “МЧЖга раҳнамолик қилишини билдирган ва ушбу мақсадда муқаддам 1 млн. сўм олган”.
Давлат хавфсизлик хизматининг Сирдарё вилояти бўйича бошқармаси ўтказган тадбир давомида ўринбосар поранинг 400 долларлик иккинчи қисмини олаётганда қўлга туширилган.
“Ҳозирда ушбу мансабдор шахсга нисбатан Жиноят Кодексининг 210-моддаси (пора олиш) билан жиноят иши қўзғатилиб, тергов ҳаракатлари олиб борилмоқда”,-дейилади расмий билдирувда.
Сўнгги бир йилда Ўзбекистонда қатор туманларда ҳоким ўринбосарлари катта миқдорда пора олаётганда қўлга тушгани хабар қилинди.
Жумладан, февралда Миришкор тумани ҳокимининг муовини ер ажратиб бериш эвазига тадбиркордан 80 минг доллар пора талаб қилиб, шундан 50 минг АҚШ долларини олган вақтида қўлга олинган.
Шунингдек, февраль ойида Чинозда туман ҳокимининг иқтисодий масалалар бўйича биринчи ўринбосари 35 гектар ер майдонини сотиш ва ҳужжатларни туман ҳокимлиги орқали расмийлаштириб бериш эвазига келишилган 90 минг доллардан 40 минг долларини олган вақтида қўлга тушган эди.