Интерполнинг Ўзбекистондаги Миллий марказий бюроси ходимлари томонидан халқаро қидирувда бўлган шахсни экстрадиция қилиш Швециядан биринчи марта амалга оширилди. Бу ҳақда бюро матбуот хизмати 26 март куни хабар берди.
“Тошкент ва Стокголм Интерпол Миллий Марказий бюроларининг ҳамкорликдаги ҳаракатлари ҳамда Лион шаҳрида ўтказилган Миллий марказий бюролар раҳбарларининг йиллик конференция давомидаги учрашувлар натижасида Швециядан биринчи марта жиноятчи Ўзбекистонга экстрадиция қилинди”, дейилади расмий билдирувда.
Мазкур шахс бошқа бир нечта шериги билан тегишли ҳужжатларни қалбакилаштириш орқали кўчмас мулкни сотиш билан шуғулланганликда ва фирибгарлик ҳаракатлари орқали катта моддий зарар етказганликда гумонланмоқда.
Интерполнинг Ўзбекистондаги бюроси қидирилаётган шахс Европа Иттифоқи ҳудудида яширингани тўғрисида маълумотларга эга бўлган. Тезкор-қидирув тадбирлари давомида у Швеция ҳудудида яшаётгани аниқланган аниқланган ва ҳибсга олинган.
"Ўзбекистон Бош прокуратурасининг экстрадиция тўғрисидаги илтимосномаси қаноатлантирилганидан сўнг гумонланувчи Интерпол ММБ ходимлари ҳамроҳлигида Ўзбекистонга олиб келинди", дейилади билдирувда.
Халқаро қидирувда бўлган шахс Швециядан Ўзбекистонга экстрадиция қилинди
Қидирувдаги шахсни Ўзбекистонга экстрадиция қилиш пайтида олинган фотосурат. ИИВ сайтидан олинди.