Heritage фонди ва The Wall Street Journal нашри томонидан ҳозирланган “Иқтисодий эркинлик индекси – 2023” рейтингида Ўзбекистон дунёдаги 176 мамлакат орасида 109-ўринни (56,5 балл) эгаллаб, ўзининг бир йил аввалги мавқеига нисбатан 8 поғонага юқорилаган.
Ўтган йили мамлакат мазкур рейтингда 2021 йилдагига (108-ўрин) нисбатан 9 поғонага пастлаб, 117-ўринни эгаллаган эди. Яъни Ўзбекистон бу йил 2021 йилда эришган мавқеига етишига бир поғона қолган ва шу тариқа “иқтисоди асосан эркин бўлмаган мамлакатлар” даврасида қолган.
Heritage ва WSJ ҳисоботида Ўзбекистон индексдаги Инвестициялар эркинлиги, Молиявий эркинлик, Давлат яхлитлиги, Монетар эркинлик каби индикаторлар бўйича ижобий ўзгаришларга эришгани, Фискал саломатлик, Давлат харажатлари, Мулкчилик ҳуқуқи, Суд каби фаолияти самарадорлиги индикаторлар бўйича эса ортга чекингани қайд этилган. Ҳисобот муаллифлари ўзбек расмийларига ҳуқуқ устуворлиги бўйича ислоҳотлар ўтказишни тавсия қилишган.
Мазкур рейтингда биринчи бешталикка Сингапур, Швейцария, Ирландия, Тайвань, Янги Зеландия, сўнгги бешликка эса Зимбабве, Судан, Венесуэла, Куба ва Шимолий Корея каби мамлакатлар киритилган.