Ўзбекистонда келаётган йилдан бошлаб ҳар йили апрель ойининг биринчи ҳафтасида “Китобхонлик ҳафталиги” ўтказилади. Бунга оид қарор республика ҳукумати томонидан 14 декабрь куни қабул қилинган.
Қарор билан 2020-2025 йилларда китобхонлик маданиятини ривожлантириш ва қўллаб-қувватлаш миллий дастури тасдиқланган.
Мазкур дастурни амалга оширишнинг устувор йўналишларидан бири ўлароқ аҳолининг, аввало ёшларнинг маънавий-маърифий, бадиий-эстетик талабларига жавоб берадиган китобларни юксак сифат билан чоп этиш, нашриётлар ва ижодкорлар фаолиятига кўмаклашиш, болаларга мўлжалланган адабиётларни чоп этишни қўллаб-қувватлаш экани қайд этилмоқда.
Миллий дастур 3 босқичда амалга ошириш режаланган: биринчи босқич – 2020-2021 йилларда китобхонлик маданиятини ривожлантириш бўйича ташкилий-ҳуқуқий механизмларни такомиллаштириш чора-тадбирлари амалга оширилади, иккинчи босқич – 2022-2023 йилларда китобхонликка оид инфратузилма мустаҳкамланади, учинчи босқич – 2024-2025 йилларда ёшларнинг китобхонлик маданиятини жадал ривожлантириш, уларнинг интеллектуал салоҳияти ўсиши ҳисобига инсон капитали сифатини яхшилаш бўйича ишлар олиб борилади.
Дастурни 2020-2021 йилларда амалга ошириш бўйича “Йўл харитаси”га кўра, нашриётлар томонидан ёзувчиларга ажратиладиган гонорар масаласини такомиллаштириш юзасидан норматив-ҳуқуқий ҳужжат лойиҳасини ишлаб чиқиш ҳам назарда тутилган.