Ўзбекистонда коронавирус инфекциясига қарши вакцина олмаган 26 минг 8 нафар шахс ишдан вақтинчалик четлатилди. Бу ҳақда Санитария-эпидемиологик осойишталик ва жамоат саломатлиги хизмати маълумот тарқатди.
Қайд этилишича, аҳоли ўртасида оммавий эмлашни ташкил этишнинг ҳуқуқий асосларини янада такомиллаштиришга қаратилиб, жорий йил 2 август куни қабул қилинган қонунга мувофиқ равишда меҳнат қонунчилигига профилактик эмлашдан ўтишни рад этган ходимни ишга қўймаслик имконини берадиган қўшимча киритилган.
Сапэпидхизмати мазкур меъёрга риоя қилиниши юзасидан ўтган давр мобайнида 27 минг 923 та текширув ўтказган. Булардан 7 минг 905 таси хўжалик юритувчи субъектларда, 20 минг 18 таси эса бюджет ташкилотларида ўтказилган.
Текширишлар давомида вакцина олмаган жами 50 минг 56 нафар шахс аниқланиб, улардан 11 244 нафари хўжалик юритувчи субъектларда, 38 минг 812 нафари бюджет ташкилотларида фаолият кўрсатгани айтилган.
Кўрилган чоралар орасида 26 мингдан зиёд ходимни ишдан четлатишдан ташқари иш берувчига нисбатан жарима чораси (2 225 та холатда) ҳамда объект фаолиятини вақтинчалик муддатга тўхтатиш чораси (175 та ҳолатда) кабилар бор.
Хабарномада олиб борилаётган чора-тадбирлардан кўзланган мақсад аҳоли саломатлигини ҳимоя қилиш, пандемияни енгишга уриниш экани урғуланган.
Аввалроқ Соғлиқни сақлаш вазирлиги Ўзбекистонда апрель ойидан шу кунга қадар коронавирусга қарши эмловда қарийб 30,6 миллион доза вакцинадан фойдаланилгани ҳақида маълум қилган.