Ўзбекистонда 2022 йилнинг 1 январидан бошлаб автотранспорт воситаларини сотиб олганлик учун белгиланган 3 фоизлик йиғим бекор қилинганини Gazeta. uz, Kun.uz ва Daryo.uz нашрлари ҳуқуқшунос Хушнуд Худойбердиевга таянган ҳолда иддао қилди.
Нашрларнинг хабар беришича, ҳуқуқшунос Хушнуд Худойбердиев “2022 йил учун Ўзбекистон Республикасининг давлат бюджети тўғрисида”ги қонуни матнида автомобилни сотиб олганлик учун йиғим назарда тутилмаганидан келиб чиқиб, автотранспорт воситаларини сотиб олганлик учун белгиланган 3 фоизлик йиғим бекор қилинганини эълон қилган.
“Демак, ушбу йиғим 1 январдан тўлиқ бекор қилинган. Бунгача амалда бўлган тартибга кўра, автосалондан янги машина сотиб олганда шартнома нархининг 3 фоизи миқдорида йиғим тўланарди (масалан, 100 миллион сўмлик машина учун 3 миллион сўм, 300 миллион сўмлик бўлса, 9 миллион сўм)”,-деб ёзган ҳуқуқшунос.
Айни пайтда Ўзбекистон ҳукуматига қарашли биронта нашр ёки вазирлик ва ёки расмий шахс бу борда расман маълумот бермади.
Маҳаллий матбуотнинг ёзишича, ҳуқуқшуносга ишониладиган бўлса, иккиламчи бозорда ҳам сотиб олинадиган машиналар нархи камаяди.
“Иккиламчи бозордан машина сотиб олинганда ишлаб чиқилган йилига қараб ҳар бир от кучи учун 29 минг 700 сўмгача йиғим олинарди. Масалан, ишлаб чиқарилганига 3 йил тўлмаган 100 от кучига тенг машинани сотиб олганлик учун деярли 3 миллион сўм йиғим тўланарди”,-деб ёзди Daryo.uz.