Ўзбекистон Марказий банки жорий ҳафтада валюталарнинг сўмга нисбатан қийматини тўрт марта алмаштирди. Авваллари бу иш МБ томонидан бир, кўпи билан икки марта амалга оширилган.
Жорий йил 16 февралидан Ўзбекистонда АҚШ долларининг расмий курси ўтган ҳафтага нисбатан 9 сўм 26 тийинга ошиб, 10 минг 540 сўм 9 тийинни ташкил этгани ҳақида Озодлик аввалроқ хабар қилган.
МБ доллар курсини 17 февралдан 12 сўм 91 тийинга, 18 февралдан 5 сўм 70 тийинга, 19 февралдан эса 6 сўм 90 тийинга пасайтирган. Шу тариқа АҚШ долларининг расмий курси жумага келиб 10 минг 514 сўм 58 тийинга тенг бўлган.
Евронинг расмий курси ҳам сешанбадан бошлаб 109 сўм 17 тийинга кўтарилиб, 12 минг 790 сўм 40 тийинга тенг бўлганди. Мазкур курс 17 февралдан 3 сўм 81 тийинга кўтарилган,18 февралдан 97 сўм 41 тийинга, 19 февралдан эса 1 сўм 50 тийинга пасайган. Пировардида жума кунига келиб евронинг расмий курси Ўзбекистонда 12 минг 695 сўм 30 тийин қилиб белгиланган.
Валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини зиммасига олмаган.