Қорақалпоғистонда шу йил июль ойи бошида бўлиб ўтган норозилик намойишларида иштирок этганликда гумонланаётган 10 кишининг қамоқ эҳтиёт чораси 30 август куни уй қамоғига алмаштирилган. Бу ҳақда Қорақалпоғистон воқеаларини ўрганиш бўйича Олий Мажлис комиссияси телеграм-канали орқали маълумот тарқатилди.
Сешанба куни Нукус воқеалари иштирокчиларидан 24 нафари уй қамоғига чиқарилгани ҳақида Озодлик аввалроқ хабар қилган эди. Бу чора “комиссия аъзоларининг таклифи ва Қорақалпоғистон парламентининг илтимосномасига кўра” амалга оширилгани айтилган. Шу тариқа уй қамоғига чиқарилган гумонланувчилар сони 34 нафарга етган.
Айни пайтда Қорақалпоғистондаги тартибсизликларда гумонланиб, қанча одам ҳисбда сақланаётгани хусусида аниқ расмий маълумот йўқ.
Ўзбекистоннинг янги таҳрирдаги конституциясида Қорақалпоғистон мақомининг ўзгартирилишига қарши 1-2 июль кунлари Нукусда ўтказилган оммавий норозилик намойишлари хавфсизлик кучлари томонидан бостирилганди.
Ўзбекистон расмийлари берган маълумотларга кўра, Нукусда тартибсизликларга айланиб кетган норозилик намойишлари чоғида 21 киши ҳалок бўлган, ҳуқуқ-тартибот идоралари ходимлари дохил 243 киши яраланган. Норозилик намойишлари ортидан 516 киши қўлга олинган.