Ўзбекистон Туркиянинг зилзила ҳудудида жабр кўрганлар учун 170 тонна инсонпарварлик ёрдами юборган. Бу ҳақда Онадўли агентлиги Туркиянинг Тошкентдаги элчихонасидан олинган маълумотга таянган ҳолда хабар қилди.
Мазкур юкнинг 45 тоннасини дори-дармон ва тиббий жиҳозлар, 8 тоннасини озиқ-овқат маҳсулотлари, 90 тоннасини кийим-кечак, пойабзал, адёл, уйқу қоплари, болалар таглиги ва гигиена воситалари ташкил қилган. Бундан ташқари, юк орасида 130 та генератор, 700 та иситгич ва бошқа зарур ашёлар бор.
Инсонпарварлик ёрдами Туркиянинг зилзиладан жабр кўрган вилоятларига 6 та юк учоғи ва 7 та юк машинасида жўнатилган. Ер қимирлашидан жабрланганларга пул ёрдами йиғиш ҳам давом этмоқда.
Зилзила ҳудудида ўзбекистонлик ошпазлар томонидан беш минг кишига кунига икки маҳалдан иссиқ овқат тарқатилгани айтилмоқда.
Ўзбекистон Туркияга ФВВнинг 100 қутқарувчиси ва 71 нафар ҳарбий шифокорларни йўллагани ҳақида Озодлик аввалроқ хабар қилган эди. Қутқарувчилар Хатай вилоятидаги қидирув-қутқарув ишларида иштирок этаётган бўлсалар, врачлар бу ерда барпо қилинган дала ҳоспиталида жароҳатланганларга ёрдам кўрсатмоқдалар.
Жорий йилнинг 6 февраль Туркия жануби-шарқида, расмий маълумотларга кўра, 7,7 ва 7,6 балли ер силкиниши кузатилган. Бунинг ортидан 10 та вилоятда қурбон бўлганлар сони, 14 февраль ҳолатига кўра, 31,6 мингдан ошган.
Фожиа ортидан президент Эрдўғон Туркияда бир ҳафталик миллий мотам эълон қилган эди.