Олий Мажлис Қонунчилик палатаси депутатлари 18 май куни ўтказилган мажлисда “Ногиронлар ҳуқуқлари тўғрисидаги конвенцияни (Нью-Йорк, 2006 йил 13 декабрь) ратификация қилиш тўғрисида”ги қонун лойиҳасини кўриб чиқдилар. Бу ҳақда қуйи палата матбуот хизмати маълумот тарқатди.
Мажлисда қайд этилишича, мазкур халқаро ҳужжатнинг ратификация қилиниши ногиронлиги бўлган шахслар ҳуқуқлари билан боғлиқ муаммоларни комплекс ва тизимли ҳал қилиш ҳамда ногиронлиги бўлган шахсларни ижтимоий-ҳуқуқий ҳимоя қилишни кучайтириш, уларни давлат ва жамият хаётида тўлақонли иштирок этишлари учун замин яратади.
Шунингдек, конвенциянинг ратификация қилишини Ўзбекистонда ногиронлиги бўлган шахсларнинг ҳуқуқлари ҳамда уларнинг имкониятларини рўёбга чиқариш мақсадларида олиб борилаётган ишлар кўламини кенгайтиришда халқаро ташкилотлар ва хорижий давлатларнинг мақсадли ресурсларини жалб қилиш имконини беради.
Шулардан келиб чиққан ҳолда, қонун лойиҳаси қуйи палата депутатлари томонидан қабул қилинган ва Сенатга юбориладиган бўлган.
Ногиронлар ҳуқуқлари тўғрисидаги конвенция Ўзбекистон томонидан 2009 йили имзоланган бўлса-да, ҳалигача ратификация қилинган эмас эди.
Мамлакат парламенти мазкур халқаро ҳужжат ҳамда Қийноқларга қарши конвенциянинг Факультатив протоколини ратификация қилишни мўлжаллаётганини Ўзбекистон президенти Шавкат Мирзиёев шу йил 22 февралида БМТнинг инсон ҳуқуқлари кенгашида қилган маърузасида билдирганди.