Ўзбекистон Халқ демократик партиясидан президентликка номзод сифатида кўрсатилган Мақсуда Ворисова Давлат тест маркази фаолиятини танқид қилиб чиқди.
Шу кундаги байрам кайфияти абитуриентларга татимаётганини қайд этган М. Ворисова партия сайтида эълон қилинган мақоласида “умидвор ёшларнинг талабига жавоб бера олмайдиган Давлат тест маркази фаолиятини бутунлай қайтадан кўриб чиқиш керак”лигини урғулаган.
Тест натижалари ҳалигача чиқмаётганини таъкидлаган депутат турмушнинг “ҳар бир соҳасига рақамлаштириш кириб келган, имтиҳон саволларининг жавоблари тўғрилигини компьютер текшираётган вақтда натижаларни чўзиш кимга керак бўлиб қолди?” дея савол ташлаган.
М. Ворисова “таълимда аҳолининг барча қатламларига тенг имкониятлар яратиш мақсадида олий ўқув юртларига киришдаги имтиёзлар тизимини жиддий ислоҳ этиш зарур”лигига эътибор қаратган.
Унга кўра, имтиёзлар фақат республика ва халқаро фан олимпиадалари ғолиблари, шунингдек, ногиронлиги бўлган шахслар учун қолдирилса, мантиқан тўғри бўлади. “Қолган барча абитуриентлар соғлом рақобат муҳитида, адолат мезони бўйича сараланиши даркор”, деган ХДП номзоди Мақсуда Ворисова.