Тошкентдаги “Юнусобод спорт мажмуаси”да оғир атлетика бўйича Осиё чемпионатининг эркаклар ўртасида 109 кг вазн тоифасидаги беллашувлари якунида Руслан Нуриддинов 241 кг билан Осиё чемпионлигини қўлга киритиш қатори янги жаҳон рекордини ўрнатган.
Ўзбекистон Миллий олимпия қўмитаси маълумотига кўра, мусобақада даст кўтариш ва силтаб кўтариш машқларида 429 кглик маррани забт этган Р. Нуриддинов олтин медални қўлга киритган. Бу тоифада кумуш медаль ўзбекистонлик Акбар Жўраев (428 кг), бронза медали эса хитойлик Янг Чжега (415 кг) насиб этган.
Мазкур беллашувда хитойлик Янг Чже ҳам даст кўтариш машқида 200 кг тошни кўтаришга муваффақ бўлиб, янги жаҳон рекордини ўрнатган.
Оғир атлетика бўйича Ўзбекистон тарихидаги илк жаҳон чемпиони, “Ўзбекистон ифтихори” Руслан Нуриддинов 2018 йили допинг истеъмол қилганликда айбланиб, вақтинча спортдан четлатилгани ҳақида Озодлик аввалроқ хабар қилган.