И.В.Савицкий музейига директор этиб тайинланган Тигран Мкртичев ўз фаолиятини 2021 йилнинг 2 январидан бошлайди. Бу ҳақда Туризмни ривожлантириш давлат қўмитаси матбуот хизмати маълумот тарқатди.
Халқаро санъатшунослар томонидан “чўлдаги Лувр” номи билан танилган Нукусдаги Савицкий номидаги Давлат санъат музейига ўтган йил ёзида 60 ёшли Тигран Мкртичев тайинлангани ҳақида Озодлик аввал хабар қилган. У Ўзбекистон Маданият вазирлиги томонидан ўтказилган халқаро танловда ғолиб деб топилганди.
Тошкент давлат университети ва Ўзбекистондаги Санъатшунослик институтида ўқиган Тигран Мкртичев номзоди таркибига Россия, Германия ва ЮНЕСКО санъат намояндалари киритилган махсус кенгаш томонидан танланган.
“Директор сифатида Тигран Мкртичев И.В.Савицкий номидаги музей коллекциясини ўрганиш бўйича Халқаро кенгаш ташкил қилиш ташаббусини билдириб, шунингдек таниқли рассомлар, сиёсатчилар ва бизнес соҳаси вакилларини ўз ичига олган музейнинг халқаро васийлик кенгашини ташкил этиш ҳам унинг вазифасига киради”, дейилган Туризмни ривожлантириш давлат қўмитаси хабарномасида.
Нукус музейига москвалик рассом, коллекция йиғувчи, санъатшунос олим, археолог, реставратор ва этнограф Игорь Савицкий асос солган. 1966 йилнинг 5 февралида иш бошлаган бу музейнинг биринчи раҳбари ҳам Савицкийнинг ўзи бўлган.
Тигран Мкртичев аввалроқ Озодлик билан суҳбатда москвалик рассом томонидан асос солинган музей ишини жонлантиришда “Ўзбекистонга Москвадан борган бошқа бир рассом кўмаклашиши вақти келган бўлса, ажаб эмас”, деб айтган эди.
Браузерингиз HTML5 ни қўллаб- қувватламайди
Тигран Мкртичев: "Нукус музейи дунёнинг энг нуфузли музейлар ўнталигига кириши керак!"
“Ўзбекистоннинг етти мўъжизасидан бири” дея эътироф қилинган мазкур музейда ўғирлик ва санъат асарларини асрашга лоқайдлик билан қаралиши ортидан кейинги йилларда бир неча бор раҳбар ўзгарган.
Хусусан¸ 2017 йил сентябрида Ўзбекистон Миллий хавфсизлик хизмати музейда мутахассислар текширув ўтказгани ва музейда 581 миллион 625 минг сўмлик 5 картина йўқлиги аниқлангани, бунинг ортидан 28 август куни жиноят иши очгани хабар қилинган эди.
2015 йилда эса ўша пайтдаги президент И. Каримов тўнғич қизи Гулнора Каримованинг Женевадаги қароргоҳида Нукус музейига оид асарларнинг топилиши¸ Ўзбекистон Давлат санъат музейи бош муҳофизининг расм ўғирлаганликда айбланиб, қамоққа олиниши ва МХХ собиқ зобитининг давлат музейидан 32 расм ўғирлаганига оид айбловлар халқаро майдонда шов-шувга сабаб бўлган. Шу муносабат билан музейни 31 йил мобайнида бошқариб келган Мариника Бобоназарова ишдан олинган эди.