Ўзбекистон пойтахтида ноқонуний жамоат кўринишида йиғинлар ташкил этганликда гумонланган кишилар қўлга олинган. Бу ҳақда Ўзбекистон Давлат хавфсизлик хизмати маълумот тарқатди.
Хабарномада қайд этилишича, қўлга олинган 17 кишилик гуруҳ ичида божхона идораларининг уч нафар ходими, Тошкент давлат шарқшунослик университети талабаси, технопарк директори ўринбосари, хусусий автомактаб директори ўринбосари, “Сергели-авто” бозорида савдо билан шуғулланувчи шахслар ва бошқалар бор.
ДХХ иддаосича, қўлга олинганлар ичида бўлган Божхона қўмитасининг бошқарма бошлиғи ўринбосари “динга мутаассибларча берилиб, 2021 йилдан бошлаб мазкур норасмий диний дарсларни мунтазам равишда ташкил этиб келган”.
“У ҳар бир дарс учун жамоат аъзоларидан маълум миқдорда пул йиғиб, устозларга берган”, дейилган хабарномада.
Гуруҳ аъзоларининг 1989 йилда Наманган вилоятида туғилган ва ҳозирда Миср Араб Республикасида бўлган шахсдан Телеграм мессенжери орқали онлайн тарзда сабоқ олишгани, уларга Тошкент давлат шарқшунослик университети талабаси ҳам оффлайн тарзда диний маърузалар ўтгани айтилган.
“Ҳозирда Божхона қўмитаси бошқарма бошлиғи ўринбосари, божхона органлари тезкор ходими ва катта инспектори, шунингдек, Тошкент давлат шарқшунослик университети талабаси ҳамда жамоат аъзоларига Миср давлатидан туриб, онлайн тарзда диний сабоқ берган фуқарога нисбатан Жиноят Кодексининг 216-моддаси (Жамоат бирлашмалари ёки диний ташкилотларни қонунга хилоф равишда тузиш) билан жиноят иши қўзғатилиб, тергов ҳаракатлари олиб борилмоқда”, дейилган хабарномада қолган фуқаролар жиноят иши доирасида гумонланувчи сифатида терговга жалб қилингани қўшимча қилинган.
Аввалроқ Озодлик парламент қуйи палатасида “Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳаси қабул қилиниб, тасдиқ учун Сенатга юборилгани ҳақида хабар қилганди. Диний соҳадаги концепция қабул қилинаётган бир пайтда фуқароларнинг ноқонуний жамоат тузганлик айблови билан қўлга олиниши жамоатчилик орасида қатор фаразлар урчишига йўл очди.
Ҳьюман Райтс Уотч халқаро ташкилотининг дунёда инсон ҳуқуқларининг аҳволига доир ўтган ойда ёйинлаган галдаги йиллик ҳисоботида Ўзбекистонда расмийлар диний жамоаларни рўйхатдан ўтказишга тўсқинлик қилиш, собиқ диний маҳбусларни ўзбошимчалик билан назорат қилиш ва мусулмонларни экстремизм билан боғлиқ кенг ва ноаниқ айбловлар билан жиноий жавобгарликка тортиш орқали дин эркинлигини чеклаётгани танқид қилинган эди.