Turkish Airlines ширкатининг собиқ раҳбари Илкер Айжи Uzbekistan Airways компаниясини етакчи минтақавий авиакомпанияга айлантириш режасини амалга оширишга жалб қилинди. Бу ҳақда президент матбуот хизмати 14 декабрда маълум қилди.
Илкер Айжи Turkish Airlines ширкатига 2015−2022 йилларда раҳбарлик қилган. Президент матбуот хизматининг ёзишича, “Илкер Айжи Turkish Airlines авиакомпаниясини бошқарган кезда уни минтақавий даражадан глобал миқёсга муваффақиятли олиб чиққан”.
Расман билдирилишича, 14 декабрь куни Айжи президент Шавкат Мирзиёевга Uzbekistan Airways трансформацияси бўйича таклифларни тақдим этган.
Режага асосан авиакомпанияда корпоратив бошқарув тизимини жорий этиш, ҳаво кемаларини кўпайтириш, хизматлар сифатини ошириш ва юк ташиш тармоғини кенгайтириш, хорижий инвесторларни жалб этган ҳолда авиакомпанияни жаҳон стандартлари асосида хусусийлаштириш назарда тутилган.
Бунлан ташқари Uzbekistan Airways чипталарини арзонлатиш масаласи ҳам кун тартибига киритилган.
Ўзбекистон фуқаролари кўп йиллардан бери Uzbekistan Airways чипталари қимматлигидан шикоят қилиб келади. Лекин бу борадаги нарх сиёсати ўзгармасдан қолаётганди. Шунинг учун ҳам кўплаб ўзбекистонликлар арзон нархларда халқаро парвозларни амалга оширадиган Қирғизистон ва Қозоғистон авиаширкатлари хизматидан фойдаланиб келади.
Turkish Airlines собиқ раҳбари Uzbekistan Airwaysни ислоҳ қилишга кўмаклашадиган бўлди
Илкер Айжи Turkish Airlines ширкатига 2015−2022 йилларда раҳбарлик қилган.