Ўзбекистонда хорижий давлатларга чиқадиган транспортлардан ташқари барча транспортларга шу йил 1 сентябридан техник кўрикдан ўтганликка оид талонларни бериш амалиёти бекор қилинади. Бу ҳақда ҳукуматнинг 9 март куни қабул қилинган “Транспорт воситаларини мажбурий техник кўрикдан ўтказиш тартибини такомиллаштиришга доир қўшимча чора-тадбирлар тўғрисида”ги қарорида белгиланган.
Ҳужжатга мувофиқ, транспорт воситаларини Давлат йўл ҳаракати хавфсизлиги хизмати бўлинмаларида мажбурий техник кўрикдан ўтказишда ҳаракатланувчи мобиль техник назорат линияларидан фойдаланиш тартиби жорий этилади.
Қайд этилишича, 1 сентябрдан жисмоний шахсларга тегишли йўловчиларни ташиш учун фойдаланиладиган ва ҳайдовчининг ўриндиғидан ташқари ўриндиқлар сони 8 тадан ошмайдиган, яъни енгил автомобилларни тадбиркорлар (юридик шахслар) томонидан мажбурий техник кўрикдан ўтказишда ҳаракатланувчи мобиль техник назорат линияларидан фойдаланилади. Янги автомобиллар эса ДЙҲХХ органларида рўйхатдан ўтказишда техник кўрикдан ўтказилмайди.
Шу йилнинг 1 июлигача автотранспортларни мажбурий техник кўрикдан ўтказиш фаолиятини амалга оширувчи тадбиркорларга Давлат йўл ҳаракати хавфсизлиги хизматининг “Техник кўрик” автоматлаштирилган ахборот тизимига кириш имконияти яратилади.
Қарор билан Транспорт воситаларини мажбурий техник кўрикдан ўтказиш тартиби тўғрисидаги низом ҳам тасдиқланган.
Низомда техник кўрикдан ўтказилиши керак бўлган автотранспорт воситалари турлари белгиланган:
- тижорат асосида йўловчилар ташувчи енгил автомобиллар, автобуслар, троллейбуслар, трамвайлар ва ўриндиқлар сони 8 та ва ундан ортиқ бўлган (ҳайдовчининг ўрнидан ташқари), одамларни мунтазам ташиш учун жиҳозланган юк автомобиллари, йирик габаритли, оғир вазнли ва хавфли юкларни ташиш учун махсус транспортлар ва уларнинг тиркамалари – бир йилда икки марта;
- ишлаб чиқарилганига 6 йилдан кўп бўлмаган транспортлар – икки йилда бир марта;
- ишлаб чиқарилганига 6 йилдан ортиқ бўлган, шунингдек ишлаб чиқарилган вақти аниқ бўлмаган транспортлар – бир йилда бир марта;
- тиркамалар техник кўрикка транспорт воситаси – шатакчи учун белгиланган муддатларда;
- навбатдаги техник кўрикдан ўтказишнинг илгари ўрнатилган муддатларидан қатъи назар, уларни ДЙҲХХ органларида рўйхатдан ўтказиш (қайта рўйхатдан ўтказиш) вақтида.