Тошкент вилоятининг Зангиота туманида жойлашган мебель цехида 12 октябрь куни тушдан кейин ёнғин чиқди. Ёнғин тасвири акс этган видеолар ижтимоий тармоқларда тарқади.
Фавқулодда вазиятлар вазирлиги мазкур ёнғинга оид хабар вилоят ФВБга сешанба куни соат 15:08 да келиб тушганини билдирди.
Қайд этилишича, хабар ортидан ҳодиса жойига 7 та ёнғин-қутқарув экипажи йўлланган, улар ёнғин содир бўлаётган жойга соат 15:16 да етиб боришган, соат 15:25 да ёнғинни қуршаб олишга, соат 16:07 да эса батамом ўчиришга муваффақ бўлишган.
ФВВ ҳодиса оқибатида ҳеч ким жабрланмагани ва қурбон бўлмаганини урғулаган. Ёнғин туфайли мебель цехининг тахминан 170 квадрат метр майдонда томи, шифти ҳамда ички жиҳозларига зарар етган.
Вазирлик маълумотига кўра, айни пайтда ёнғиннинг келиб чиқиш сабаби ва моддий зарар миқдори аниқланяпти.