АҚШнинг Ўзбекистондаги элчихонаси собиқ сиёсий маҳбус ва шарқшунос олим Андрей Кубатиннинг вафоти муносабати билан унинг оиласи, дўстлари, ҳамкасблари ва талабаларига ҳамдардлик билдирди.
“Ковидга қарши курашда мағлуб бўлишдан олдин Андрей ўзининг демократик тамойилларига бўлган садоқати, шунингдек ўзининг фундаментал ҳуқуқлари бузилган чоғда адолатни ҳимоя қилишда кўрсатган шахсий жасорати билан кўпчиликни илҳомлантирди. Уни таниганлар ёки унинг тақдири тўғрисида билганлар унинг ушбу ҳуқуқлар учун тўғридан-тўғри ва самарали курашишга бўлган қатъиятидан таъсирландилар. У озодлик ва адолат сари интилаётганларнинг барчасига намуна эди”, дейилган элчихона баёнотида.
Ўзбекистонлик турколог олим Андрей Кубатин коронавирус инфекциясига чалингани ортидан шу йил 29 октябрь куни 36 ёшида оламдан ўтганди.
Тошкент давлат шарқшунослик институтида катта ўқитувчи бўлиб ишлаган А. Кубатин 2017 йил декабрида давлатга хиёнатда айбланиб, 11 йилга маҳкум этилган, орадан бир йил ўтиб, аппеляция маҳкамаси жазо муддатини 5 йилга туширганди. Ўша пайтда унинг яқинлари ва маслакдошлари ёш турколог олимга қарши жиноят иши уйдирилганини айтишган.
Халқаро ташкилотлар ва илмий жамоатчиликнинг чақириқлари ортидан Кубатин 2019 йил сентябрида Тошкентдаги маҳкама залидан озод этилиб, бутунлай оқланганди.
Андрей Кубатин халқаро илмий доираларда яхши танилган турколог, археолог ва этнограф олим эди. У ўрта асрлардаги Марказий Осиё, туркий халқлар ва Эрон тарихига оид тадқиқотлар олиб борган.