Ўзбекистон ҳукумати яқин кунларда COVID-19га қарши Россия вакцинасини синовдан ўтказиш тўғрисида қарор қабул қилади. Бу ҳақда “Новости” агентлиги Ўзбекистон Санитария эпидемиология хизматига таянган ҳолда хабар берди.
Билдирилишича, Ўзбекистонга синовдан ўтказиш учун юз доза “Cпутник V” вакцинаси етказиб берилган.
“Бугунги кунда бу масала муҳокама қилинмоқда, ҳозир ҳукуматнинг қарорини кутмоқдамиз. Ўйлайманки, яқин кунларда бу масала ҳал этилади”,-деб иқтибос келтиради агентлик Санитария эпидемиология хизматининг исми айтилмаган вакилига таянган ҳолда.
Озодлик радиоси 4 декабрь куни Россиянинг COVID-19га қарши “Cпутник V” вакцинаси намуналарини Тошкентга шахсан Россия саноат ва савдо вазири Денис Мантуров олиб келгани ҳақида хабар берганди.
Расмий билдирувда таъкидланишича, вакцина намуналарини Ўзбекистон санитария эпидемиология хизмати бошлиғининг биринчи ўринбосари Холмамат Норбоев қабул қилиб олган.
Куни кеча Соғлиқни сақлаш вазирлиги "Спутник-V" вакцинасини Ўзбекистонда синовдан ўтказиш режалангани ва бунинг учун Россияга 500 доза вакцина учун буюртма берилганини хабар қилганди.
Айни пайтда Ўзбекистонда Хитой вакцинаси клиник тадқиқотларининг биринчи ва иккинчи босқич ҳужжатлари экспертизаси ҳамда унинг сифат назорати текширувлари ўтказилмоқда.
Ўзбекистонда Хитойнинг коронавирусга қарши вакцинаси синовининг учинчи босқичини ўтказишга тайёргарлик кўрилмоқда, вакцина 5 минг кўнгиллида синаб кўрилиши хабар қилинган.