Линклар

Шошилинч хабар
16 май 2022, Тошкент вақти: 17:33

Халқаро хабарлар

Россияда H5N8 парранда гриппи вируси илк маротаба одамга юқди

Ўтган йилнинг декабрь ойида гриппнинг янги тури Россия жанубидаги паррандачилик фабрикасида ишлаётган етти нафар ишчига юққан.

Россияда парранда гриппининг H5N8 деб номланувчи штамми одамга юққан илк ҳолат қайд этилди.

Расмийларнинг таъкидлашича, декабрь ойида гриппнинг янги тури Россия жанубидаги паррандачилик фабрикасида ишлаётган етти нафар ишчига юққан.

20 февраль куни Роспотребнадзор раҳбари Анна Попова бу ҳолат ҳақида Жаҳон соғлиқни сақлаш ташкилотига (ЖССТ) маълумот берилганини айтди.

Попованинг айтишича, H5N8 вирусини юқтирган етти шахс «айни дамда ўзларини яхши ҳис қилишмоқда».
Попова вирус одамдан одамга юққан ҳолатлар қайд этилмаганини айтди.

ЖССТ Россия ушбу ҳолат тўғрисида маълумот берганини тасдиқлади.

Кун янгиликлари

Россия Украина шарқида янги ҳужумларга тайёргарлик кўрмоқда, НАТО Украина ғалаба қозонишини башорат қилмоқда

Украина аскарлари.

Украина ҳукумати мамлакатнинг иккинчи йирик шаҳри бўлган Харьков атрофида Россия армиясига қақшатқич зарбалар беришда давом этаётганини маълум қилди. Айни пайтда президент Владимир Зеленский 15 май куни кечқурун берган баёнотида Россия қўшини Донбассни тўлиқ назоратига олиш учун янги ҳужумларга тайёрланаётганини айтди:

“Биз Россиянинг Донбассга уюштирадиган янги ҳужумларини қайтаришга тайёргарлик кўрмоқдамиз. Оккупантлар ҳалигача боши берк кўчага кириб қолганларини, улар “махсус амалиёт” деб атаётган операция аллақачон банкрот бўлганини англай олмаяптилар”,-деди Зеленский.

Украина президенти маслаҳатчиси Алексей Арестович Харьковдан чекинган рус бўлинмалари Донбасс йўналишига ташланаётганини билдирди.

НАТО Бош котиби Йенс Столтенберг ташкилотга аъзо давлатлар расмийлари билан 15 май куни Берлинда ўтказган учрашувда “Уруш Москва режалаштирганидек бўлмаяпти”, деб айтди ва давлатларни Украинага ҳарбий кўмакни кучайтиришга чақирди.

16 май куни НАТО Эстонияда кенг кўламли ҳарбий ўқув машғулотларини бошлайди. Шу куни Брюсселда Европа Иттифқи ташқи ишлар вазирлари Украинадаги вазиятни муҳокама қилади. Мазкур учрашувда Россияга нисбатан янги санкциялар жорий этиш масаласи кўриб чиқилади.

Bloomberg: Германия Россия нефтидан йил охирига қадар воз кечади

Германия Россия нефти импортидан йил охиригача воз кечади, ҳатто Евроиттифоқ мамлакатлари Россияга қарши санкцияларнинг олтинчи туркуми доирасида ёқилғи сотиб олишни тақиқлаш бўйича тил топиша олмаган тақдирда ҳам, дея хабар қилди Bloomberg.

Нашр манбасига кўра, ГФР ҳукумати олти-етти ой мобайнида муқобил таъминотчи масаласини ҳал қила оламиз, деб ҳисоблайди. Айнан қайси мамлакатлар Германиянинг нефтга эҳтиёжини қондириши мумкинлиги ҳозирча очиқланмаган.

Германия иқтисодиёт вазирлигига кўра, Россия Украинада уруш бошлаганидан бери Россиянинг Германияга нефть етказиб беришдаги улуши 35 фоиздан 12 фоизга камайган.

Энг катта муаммолардан бири Шведт шаҳрида жойлашган Европадаги энг йирик нефтни қайта ишлаш заводига хомашё етказиб бериш масаласидир. “Роснефть” назоратидаги ушбу завод, хусусан, Берлин халқаро аэропортини ёқилғи билан таъминлайди. Bloomberg ва Reuters маълумотига кўра, ҳукумат заводни ўз назоратига олиш имкониятини кўриб чиқмоқда.

ЕИ мамлакатлари 8 майдаги учрашувда Россияга қарши санкциялар янги туркуми хусусида келишувга эриша олмаган. Россия нефти импорти ва транспортировкасига чеклов қўйиш ташаббусини ҳозирча Венгрия “ўтказмаяпти”.

Санкцияларнинг олтинчи туркуми, жумладан, Россия нефтини харид қилиш ва ташишга тақиқ қўйишни назарда тутади. Санкциялар лойиҳасида Россия ёқилғисига қаттиқ тобе бўлмиш Венгрия, Чехия ва Словакия учун истиснолар таклиф этилганди. Бироқ Венгрия ҳукумати бу “юмшатиш” етарли эмас деб ҳисоблаб, бошқа мамлакатлардан нефть сотиб олишга ўтиш сарф-харажатларини қоплаб беришни талаб қилмоқда.

Олтинчи санкциялар туркуми маъқулланиши учун уни Евроиттифоқнинг барча мамлакатлари дастаклаши лозим. Бу масала ЕИ мамлакатлари ташқи ишлар вазирлари йиғилишида бугун, яъни 16 май куни муҳокама қилинади.

Россиянинг АҚШдаги элчиси: “Биз чекинмаймиз”

Анатолий Антонов

Россиянинг АҚШдаги элчиси Анатолий Антонов Россия Украинада “таслим бўлмаслиги”га ишончи комиллигини айтди. Унга кўра, Россиянинг АҚШдаги дипломатлари “олий бош қўмондон қуролли кучлар олдига қўйган барча вазифалар тўла-тўкис адо этилади”, дея ишонадилар.

“Соловьёв Live” телеканали ёйинида сўзлаган Антоновга кўра, АҚШ Россияни сулҳ музокараларига “ундамоқда”, аммо фақат ўз шартларини тиқиштиряпти. Элчининг иддаосича, Россияга учта шарт қўйилган: Украинада ҳарбий ҳаракатларни тўхтатиш, қўшинларни 24 февралгача эгаллаб турилган позицияларга қайтариш, шунингдек, “барча қилмишига тавба қилиш”. Элчи Антонов: “Бунақа капитуляция бўлган эмас, ҳеч қачон бўлмайди. Биз асло таслим бўлмаймиз, чекинмаймиз”, деган.

Элчи АҚШ Россия билан мулоқотни “боши берк кўчага тиқиб қўйган”идан, шунингдек Вашингтондаги элчихона ходимлари билан юзма-юз кўришувларни тўхтатганидан нолиган.

Россия Украинага бостириб кирган кундан бери Қўшма Штатлар Москвани ўт очишни тўхтатишга ва қўшинларини олиб чиқиб кетишга чақирмоқда. Шунингдек, АҚШ Украинанинг мустақиллиги ва ҳудудий яхлитлигини дастаклашини билдириб, Киевга катта ёрдам беряпти. Шу билан бирга, Россияга “таслим бўлиш” талаби илгари сурилаётган эмас. АҚШ мазкур можаро музокаралар йўли билан бартараф этилишини, аммо бу Россия тарафининг диктати асосида бўлмаслиги кераклигини урғулаб келади.

Кремль Украина шарқидаги ўзини “ДХР” ва “ЛХР” деб атаётган айирмачи республикалар мустақиллигини тан олишидан ва Украинага ҳужум қилишидан бир кун олдин элчи Антонов “Донбасс ва Луганск Украинанинг бир қисми эканини тасдиқламоқчи эдим”, деб айтган ҳамда Россиянинг Украинага бостириб кириш ва унинг ҳудудларини ишғол этиш режаси йўқлигини иддао қилган.

“Азовсталь” заводидаги ярадорларнинг аҳволи кундан-кунга оғирлашяпти

"Азовстал"даги ярадор жангчилардан бири

Россия ҳарбийлари қамалда ушлаб турган “Азовсталь” заводи ҳудудида украиналик қарийб 600 чоғли ярадор жангчи бор. Бу ҳақда миллий телемарафон ёйинида Украин Миллий гвардиясининг 12-оператив бригадаси командири Денис Шлега маълум қилди.

Унинг айтишича, юзлаб ярадорлардан тақрибан 40 нафари жуда оғир аҳволда. Шлега дори-дармон ва тиббиёт ускуналари “жуда танқис”лигини урғулаб, вазиятни у “мураккаб” дея баҳолади, дея хабар қилди Озодликнинг украин хизмати.

Таъкидланишича, ушбу маълумотни 15 май куни ўтказилган матбуот анжуманида “Азовсталь” мудофаачиларининг рафиқалари ҳам тасдиқлаган. Улар эрлари кунига бир стакандан техник сув ичишаётгани, озиқ-овқат захираси жуда камлигини айтганлар. Оғир ярадор жангчилар орасида дори-дармон йўқлигидан ўлаётганлар кўп, наркоз бермасдан ампутация қилинган ҳоллар бўлган, дейишган анжуман иштирокчилари.

Жангчиларнинг аёллари президент Эрдўғон билан учрашиш ва ундан эрларига ёрдамлашишини илтимос қилиш учун Туркияга боришмоқчи.

“Настояшчее время” телеканали “Азов” полки жангчиси Дмитрий Козацкий билан боғланган. У ҳам “Азовстал”даги 600-700 чоғли ярадор аскардан 40-50 нафари “ўта оғир аҳволда”лиги ва шошилинч эвакуацияга муҳтожлигини таъкидлаган.

“Сув ва егулик беш кун ёки бир ҳафталик қолди. Кунда бир маҳал – фақат тушда овқатланяпмиз. Бугун сули бўтқаси билан озгинадан сабзи едик”, деган Козацкий.

Штурм ҳақида тўхталаркан, Козацкий жанг ҳаракатлари аллақачон завод ҳудудида кечаётганини билдирган. “Душман ҳужумни оғир артиллерия, танклар ва авиация билан дастаклаб турибди. Жангчиларимиз ёв ҳамлаларининг барчасини максимум даражада қайтармоқда”, деган “Азов” полки жангчиси.

АҚШ: Буффалода ирқий нафрат асосида амалга оширилган ҳужумда 10 киши қурбон бўлди

АҚШнинг Нью-Йорк штатида жойлашган Буффало шаҳридаги супермаркетда уюштирилган ҳужум натижасида 10 киши нобуд бўлди, яна уч киши тан жароҳати олди. Ҳодиса ортидан полиция 18 яшар йигитни қўлга олган. CNN хабарига кўра, у мазкур жиноятни ирқий нафрат асосида амалга оширган тахмин қилинмоқда.

CBS телеканалининг полициядан олинган маълумотга таянган ҳолда хабар қилишича, милтиқ билан қуролланган одам 14 май куни маҳаллий вақт билан соат 14:30 ларда Tops Friendly Markets дўконига кирган. У ёнидаги камера билан жиноятни Twitch’да трансляция қилиб борган.

Буффало полицияси комиссари Жозеф Грамальяга кўра, гумонланувчи тураргоҳдаёқ ўт очиб, уч кишини ўлдирган ва бир кишини яралаган. Шундан кейин у супермаркетга кирган. У ерда қўриқчилик қилган истеъфодаги полиция ходими ҳужумчига қарата бир неча марта ўқ узган, бироқ уни зирҳ камзули ва бошидаги каскаси сақлаб қолган. Кейин ҳужумчи қўриқчини ўлдирган.

Грамальянинг айтишича, пировардида гумонланувчи дўкон эшиги олдига қайтган ва полиция билан тўқнаш келган. У қуролини ўз бўйнига тақаган, бироқ куч ишлатар тузилмалар ходимлари ҳужумчини таслим бўлишга кўндириб, қўлга олишган.

CNNнинг ёзишича, гумонланувчининг исми Пэйтон Гендрон бўлиб, у отишмадан кейин ўзига қўйилаётган қотиллик айбловини тан олмаяпти. Суд ҳужумчига суд-тиббий экспертиза тайинлаган. Ҳужумчининг айби исботланган тақдирда, у умрбод қамоқ жазосига маҳкум этилиши мумкин.

Округ прокурори Эри Жон Флинн ҳужумчи Гендрон Буфаллога Конклиндан келганини қайд этган. Гумонланувчи қасддан асосан афроамерикаликлар истиқомат қиладиган мавзега йўл олгани тахмин қилинмоқда.

Расмийлар фикрича, жиноят ирқий нафрат асосида содир этилган – 13 қурбондан 11 нафари афроамерикалик бўлган.

CBS манбаларига кўра, гумонланувчи одамларни отаётган пайтда ирқий таҳқирлашга оид сўзлардан фойдаланган. Милтиқ қўндоғига Гендрон 77 киши отиб ўлдирган норвегиялик неонацист Андрес Брейвик ҳамда Янги Зеландиянинг Крайстчерч шаҳрида масжидларни нишонга олиб, асосан мусулмонлардан иборат 51 кишини ўлдирган Брентон Таррант номларини ёзиб олган. Уларнинг иккаласи ҳам кейинроқ умрбод қамоқ жазосига ҳукм этилган эди.

Бирлашган Араб Амирликлари президенти вафот этди

Халифа бин Зоид Ол Наҳаён 2004 йилдан бери мамлакатни бошқариб келган.

Бирлашган Араб Амирликлари президенти шайх Халифа бин Зоид Ол Наҳаён 13 май куни оғир касаллик оқибатида вафот этди. У 73 ёшда эди. Бу ҳақда WAM давлат агентлиги хабар берди.

Президент вафоти муносабати билан БААда 40 кунлик мотам эълон қилинди. Бугундан бошлаб вазирликлар, давлат ва хусусий ташкилотларда уч кунга иш тўхтатилди.

Халифа бин Зоид Ол Наҳаён 2004 йилдан бери мамлакатни бошқариб келган. Бундан олдин 1971-2004 йилларда унинг отаси Заид Аль Нахайян президент бўлган. Заид Аль Нахайян БААнинг асосчиси ҳисобланади.

Forbes журналининг ёзишича, БААнинг иккинчи президенти жаҳондаги энг бой одамлардан бири эди. Унинг шахсий бойлиги 15 миллиард долларни, оиласининг бойликлари эса 150 миллион долларни ташкил этади.

Астрономлар илк бор Сомон йўли галактикасидаги қора туйнук тасвирини жамоатчиликка тақдим этди

Event Horizon Telescope телескопи томонидан олинган Sagittarius A* қора туйнуги.

Астрономлар илк бор Сомон йўли галлактикаси марказидаги Sagittarius A* (Ўқотар A*) деб номланган қора туйнук суратини жамоатчиликка тақдим этди. Мазкур суратлар 2017 йилда тасвирга туширилган ва олимлар улар устида беш йил изланишлар олиб борган.

Мазкур қора туйнук Ердан 27 минг ёруғлик йили масофасида жойлашган. Астрономларга кўра, Sagittarius A* Альберт Эйнштейннинг нисбийлик назарияси тўғри эканини тасдиқламоқда. Негаки, қора туйнукнинг ҳажмлари Эйнштейннинг физик ҳисоб-китобларига мосдир.

Қора туйнук жаҳоннинг тўрт қитъасида жойлашган саккизта радиообсерватория тармоғига уланган Event Horizon Telescope воситасида 2017 йилнинг апрелида 10 кеча-кундуз давомида рангли тасвирга олинди.

Астрономларнинг айтишларича, бу каби қора туйнуклар барча галлактикаларда мавжуд. Қора туйнуклар ёруғлик ва моддаларни симириб тургани учун уларни тасвирга олиш жуда мураккаб жараён.

Олимлар, аввал таҳмин қилинганидай, қора туйнук ёруғлик ва материяни юҳодай ютмаслиги, аксинча, уларни аста секинлик билан симириши аниқланганини ҳам таъкидладилар.

Тадқиқотчиларга кўра, Сомон йўли галлактикасидаги Sagittarius A* туйнуги Қуёш системасидаги Меркурий орбитасига тенг ва Қуёшдан 4 миллион маротаба каттадир. Қора туйнукдаги ҳарорат триллион градусга тенг.

Қирғизистонда чегарадан ноқонуний ўтган 11 тожикистонлик ушланди

Иллюстратив сурат.

Қирғизистон Миллий хавфсизлик хизмати 13 май куни Сулукта шаҳрида чегарани ноқонуний равишда кесиб ўтиб, маҳаллий кўмир омборида ишлаётган 11 нафар тожикистонлик ушланганини билдирди.

Қўлга олинганларнинг барчаси Сўғд вилояти Жаббор Расулов туманидаги Қўрғонча қишлоғида истиқомат қилувчилардир. Миллий хавфсизлик хизмати улар Қирғизистонда ҳеч қандай рухсатномага эга бўлмаган ҳолда ноқонуний равишда ишлаганларини ҳам таъкидлаган.

Тожикистон фуқароларига нисбатан “Чегарадан ноқонуний ўтиш” моддаси асосида жиноят иши қўзғатилди ва иш судга юборилди. Уларга нисбатан қамоқ эҳтиёт чораси қўлланилди.

2021 йили Тожикистоннинг Сўғд вилоятида 39 қирғизистонлик чегарадан ноқонуний ўтиш айблови билан судланган эди.

Қирғизистон ва Тожикистон ўртасидаги муносабатлар 2021 йилнинг апрель ойи охирларидаги қонли тўқнашувлардан сўнг ёмонлашган.
Бир неча кун давом этган қуролли тўқнашув оқибатида қирғиз томонидан 154 киши яраланди, 36 киши, жумладан, икки бола ҳалок бўлди. Тожикистон ҳукумати эса расман 19 нафар қурбон ва 87 нафар ярадор ҳақида хабар берган.

Киевда Украина фуқаросини ўлдирганликда айбланаётган илк рус ҳарбийси судланади

Украина манзараси.

Киевда 13 май куни Украина фуқаросини ўлдирганликда айбланаётган илк рус ҳарбийсига нисбатан суд бошланиши кутилмоқда.

Терговнинг билдиришича, 2022 йилнинг 28 февралида сержант Вадим Шишмарин велосипедда мобил телефонида гаплашиб кетаётган 62 ёшли фуқарони бошидан отиб ўлдирган. Бу воқеа Сумск вилоятининг Чупаховка посёлкасида содир этилган.

21 ёшли Шишмаринни Украина Жиноят кодексининг 438-моддаси (“Уруш қонунлари ва тартибларини бузиш”) асосида судлашади.

Россия армияси Киев вилоятининг айрим туманларини бир ой – февраль ойи охиридан март ойи охирларига қадар ишғол этиб турган. Украина ҳуқуқ-тартибот идоралари маълумотига мувофиқ, бу вақт мобайнида 1200 нафардан зиёд тинч аҳоли вакили ўлдирилган.

2 апрелда Киев вилояти Россия босқинидан озод қилингач, қатор шаҳар ва қишлоқларда тинч аҳолининг жасадлари топилган. Буча шаҳрида камида 400 киши оммавий қатл қилингани тасдиқланди.

Москва эса Украинада тинч аҳоли қатлиом қилинганини, Россия ҳарбийлари фуқаровий инфраструктурани вайрон қилаётганига оид айбловларни инкор қилиб келмоқда.

Айни пайтда Россия ҳарбийлари тинч аҳолини қатлиом қилаётганига оид ҳужжат ва далиллар сунъий йўлдошлардан ҳамда видеокузатув камераларидан олинган тасвирлар воситасида тасдиқланган.

WSJ: Киев вилоятининг икки қишлоғи орасидаги йўлда 37 нафар тинч аҳоли вакили жасадлари топилди

Иллюстратив сурат

Киев вилоятининг Мотижин ва Ясногородка қишлоқлари орасидаги 7 километрлик йўлда 37 кишининг жасадлари топилди. Wall Street Journal нашрининг украин полициясидан олинган маълумотга таянган ҳолда хабар қилишича, улар март ойида вилоятга Россия ҳарбийлари бостириб кирганидан сўнг тинч ҳудудларга кетишга уринган пайтда ўққа тутилиб, ҳалок бўлишган.

WSJ ролигида Мотижиндан (Макаров тумани) шимолга кетган икки йўл урушнинг илк ҳафтасида кўплаб маҳаллий турғуннинг қатлгоҳига айлангани, шу боис айрим фуқаролар кўчиб кетиш учун жануби-шарқдаги Ясногородка қишлоғига (Фастовск тумани) элтувчи йўлдан фойдаланишга урингани айтилган.

Журналистлар автомобиллар регистраторлари видеоқайдлари ҳамда чор-атрофни ўрганиб, гувоҳлар билан сўзлашгач, россияликлар йўлни миномётлардан ўққа тутишган, деган хулосага келганлар – 3 март куни камида битта шунақа ҳолат видеога тушган эди.

Йўлда – ён кўзгуларига оқ боғич тақилган ва “Болалар” деб ёзилган мажақланган фуқаровий автомобиллардан ташқари, ўқотар қурол жароҳатидан ҳалок бўлган одамларнинг жасадлари ҳам топилган.

Россиялик ҳарбийлар Киев вилоятининг айрим туманларини бир ой – февраль ойи охиридан март ойи охирларига қадар ишғол этиб турган. Украина ҳуқуқ-тартибот идоралари маълумотига мувофиқ, бу вақт мобайнида 1200 нафардан зиёд тинч аҳоли вакили ўлдирилган.

Россияда қримтатарлардан беш нафари террорчиликка оид иш бўйича узоқ муддатларга қамалди

Тофиқ Абдулғазиев (суратда) террор ташкилоти фаолиятида иштирок этганликда айбланиб, узоқ муддатга қамалганлардан биридир.

Ростов-Дондаги жанубий округ ҳарбий суди қримтатар миллатига мансуб беш кишини “Ҳизбут-Таҳрир” иши бўйича 12 йилдан 14 йилгача муддатга озодликдан маҳрум этди. Улар террорчилик (Россия Жиноят кодексининг 205.5-моддаси) ва ҳокимиятни босиб олишга тайёргарлик кўришда (278-модда) айбланди, дея хабар қилган “Кримская солидарность” нашри.

Тофиқ Абдулғазиев, Владлен Абдулқадиров, Иззет Абдуллаев ҳамда Межит Абдураҳмановларга 12 йилдан қамоқ жазоси тайинланган. Қамоқдан чиққанларидан сўнг эса улар яна бир йиллик озодликни чеклаш жазосини ўтайдилар.

Билял Адилов 14 йилга қаттиқ тартибли қолонияга йўлланади, бу муддат тугаганидан сўнг унга нисбатан 1,5 йилга озодликни чеклаш жазосига кучга киради.

Россия Федерал хавфсизлик хизмати (ФСБ), ИИВ ҳамда Росгвардия ходимлари 2019 йил 27 март куни Қримда қримтатар фаоллари, жумладан “Кримская солидарность” жамоат бирлашмаси аъзоларининг уйларида тинтув ўтказган. Ўшанда жами 24 киши қўлга олинган.

“Ҳизбут-Таҳрир” Россия Олий судининг 2003 йилдаги қарори билан террорчи ташкилот деб топилган ва Россия ҳудудида унинг фаолият юритиши тақиқланган. Украинада ва Европанинг аксар давлатларида тақиқланмаган “Ҳизбут-Таҳрир”га доир иш бўйича Қримда 2014 йилдан бери 70 дан ортиқ киши ҳибсга олинган.

“Мемориал” ҳуқуқбонлик маркази уларнинг таъқиб этилиши сиёсий сабаблар билан боғлиқ, деб ҳисоблайди: 2014 йилда қримтатар миллатига мансуб кишилар яриморолнинг Россияга қўшилишига қарши чиқишган эди.

Қозоғистоннинг Жамбил вилоятида Ўзбекистонда қайддан ўтган автобус аварияга учради (ВИДЕО)

Қозоғистоннинг Жамбил вилоятида 12 май куни маҳаллий вақт билан соат 15:50 ларда Ўзбекистонда қайддан ўтган (“MIRONSHOX GRAND TRANS” МЧЖга қарашли) автобус аварияга йўлиққан.

“Казинформ” агентлигининг Жамбил вилояти полиция департаменти матбуот хизматидан олинган маълумотга таянган ҳолда хабар қилишича, автоҳалокат Олмаота – Тошкент трассасининг 571 километрида (Жуалин туманининг Бауиржан Мўмишули қишлоғидан 6 км нарида) рўй берган.

Дастлабки маълумотга кўра, автобус ҳайдовчиси об-ҳаво шароити ёмонлашгани (ёмғир ва дўл) туфайли рулни бошқаролмай қолиб, йўлда кетаётган трактор прицепига бориб урилган ва ағдарилиб кетган.

Авария натижасида ҳайдовчининг ёрдамчиси ва бир йўловчи воқеа жойида жон берган, 33 киши тиббий ёрдам учун касалхонага мурожаат қилган, улардан уч нафари жонлантириш бўлимида экани айтилмоқда. Автобус ичида бўлган йўловчиларнинг қанчаси ўзбекистонлик экани ҳақида ҳозирча аниқ маълумот мавжуд эмас.

Ҳолат юзасидан Қозоғистон Жиноят кодексининг 345-моддаси 4-қисми бўйича судгача текширув бошланган, зарурий экспертизалар ўтказилмоқда.

Бу орада Ўзбекистон Ташқи ишлар вазирлиги Жамбилда ЙҲТга учраган автобус ичида 53 нафар йўловчи бўлгани, улардан 47 нафари ўзбекистонлик эканини тасдиқлади. Вазирлик маълумотига кўра, авария чоғида нобуд бўлган шахсларнинг иккаласи ҳам ўзбекистонликдир.

“Айни пайтда 16 нафар юртдошимиз туман шифохонасида, жумладан, 2 нафари жонлантириш бўлимида қолмоқда”, дейилган хабарномада Ўзбекистоннинг Олмаота шаҳридаги Бош консулхонаси қошида жабрланганларга ёрдам кўрсатиш бўйича ишчи гуруҳ ташкил этилгани, дипломатлар воқеа жойига етиб боргани қўшимча қилинган.

Вазият Олмаотадаги Бош консулхона назоратига олинганини урғулаган ТИВ матбуот хизмати ўзбек дипломатлари маҳаллий ҳуқуқни муҳофаза қилиш органлари ва тиббиёт муассасалари билан доимий алоқа ўрнатишгани, марҳумларнинг жасадларини ватанга олиб келиш билан боғлиқ ташкилий масалалар ҳал этилаётганини қайд этган.

АҚШ: Кентуккилик сенатор Украинага 40 млрд доллар ёрдам тезлаштирилган тартибда ажратилишини тўхтатиб қолди

Рэнд Пол

АҚШ Конгресси Сенати Украинага 40 миллиард доллар ёрдам ажратишга доир қонун лойиҳасини тезлаштирилган тартибда қабул қилиш масаласида келишувга эриша олмади. Тезлаштириш тартиб-таомили республикачи сенатор Рэнд Пол томонидан тўхтатилди. У қонун лойиҳасига харажатлар федерал нозир томонидан аудит қилинишига оид банд киритишни талаб қилди.

Қонун лойиҳаси Конгресс қуйи палатаси томонидан 10 май куни 357 та овоз билан (қаршилар сони 57 нафар) қабул қилинган. АҚШ президенти Жо Байден Украина учун 33 миллиард сўраган бўлса, конгрессменлар таклиф қилинган суммани қарийб 40 миллиардга оширганлар.

Бу маблағ ажратилиши учун қонун Сенатда маъқулланиши ва президент томонидан имзоланиши лозим. Сенаторлар уни шу ҳафтадаёқ қабул қилишни режалашган эди, чунки аввал ажратилган маблағ 19 майда тугайди. Бироқ Пол лойиҳа матнига 40 миллиард доллар нималарга сарфланишини назорат қилувчи махсус инспектор тайинлаш назарда тутилган банд киритишни талаб қилди.

Шу билан ҳужжатни овозга қўйиш яна бир неча кунга кечикиб, келаси ҳафтада ўтказилади. Пол якка ўзи унинг қабул қилинишига тўсиқ бўла олмайди. Бироқ матнга бирон ўзгартиш киритилган тақдирда, ҳужжат қуйи палата қайтадан кўриб чиқиши учун Конгрессга қайтарилиши лозим.

Маблағ тезлаштирилган тартибда ажратилишини тўхтатиб қолган сенатор Украинага кўмаклашишни истамасликда айбланган, аммо у буни инкор этмоқда. “40 миллиард долларни бериб, у қандай сарфланишидан бехабар қолиш оқилона иш эмас. Мен чет мамлакатга эмас, балки АҚШ Конституциясига қасамёд қилганман”, деган Рэнд Пол.

Михаил Саакашвили қамоқхонадан касалхонага кўчирилди

Михаил Саакашвили суд залида (архив сурати)

Хизмат ваколатларини суиистеъмол қилганликда айбланиб, олти йиллик қамоқ жазосини ўтаётган Грузия собиқ президенти Михаил Саакашвили қамоқхонадан “Вивамеди” хусусий касалхонасига кўчирилди.

У касалхонага мутлақо махфий шароитда кўчирилган, касалхонада эса мисли кўрилмаган хавфсизлик чоралари кўрилган. Тбилиси четида жойлашган клиника кўмагидан Грузия махсус пенитенциар хизмати маҳбусларга тиббий ёрдам кўрсатишда мунтазам равишда фойдаланиб туради.

“Немис тўлқини” хабарига кўра, шифокорлар собиқ президент очликдан кейин бошланган қатор муаммолардан азият чекаётганини айтишмоқда. Мухолифатчилар Грузия расмийларидан Саакашвилини малакали тиббий ёрдам учун Европадаги клиникалардан бирига юборишни талаб қилишяпти.

Собиқ президент аввалроқ олти ва уч йилга озодликдан маҳрум этилган эди. Айни пайтда сиёсатчига қарши яна учта иш Тбилиси шаҳар судида кўриб чиқилмоқда. Саакашвили 2021 йил 1 октябридан бери панжара ортида ўтирибди. У Грузияга қайтиши билан ҳибсга олинган.

БМТ Киев вилоятида минглаб кишининг жасади топилганини билдирди

Бучада қатлиом қилинганларнинг жасадлари.

БМТнинг Инсон ҳуқуқлари бўйича кенгаши Россия аскарлари чекинганидан сўнг Киев вилоятида минглаб кишиларнинг жасадлари топилгани тўғрисида билдирди. Кенгаш бу ҳодисани уруш жиноятлари сифатида баҳолаш мумкинлигини айтмоқда.

БМТнинг Инсон ҳуқуқлари бўйича Олий комиссари Мишел Бачелет бу ҳодиса айни пайтда текширилаётганини маълум қилди.

“Киевнинг шимолий минтақасида тинч аҳолини ўлдириш кўлами, бир гуруҳ одамларни оммавий қатл этиш ҳолатлари дахшатга солди”,- деди Мишел Бачелет БМТнинг Инсон ҳуқуқлари бўйича кенгаши йиғилишида.

Кенгашда Россия ҳарбийлари Киев вилоятидаги айрим шаҳар ва қишлоқларни босиб олган пайтда қандай воқеалар юз берганини халқаро тергов қилиш масаласини муҳокама қилган.

2 апрелда Киев вилояти Россия босқинидан озод қилингач, қатор шаҳар ва қишлоқларда тинч аҳолининг жасадлари топилган. Буча шаҳрида камида 400 киши оммавий қатл қилингани тасдиқланди.

Москва эса Украинада тинч аҳоли қатлиом қилинганини, Россия ҳарбийлари фуқаровий инфраструктурани вайрон қилаётганига оид айбловларни инкор қилиб келмоқда.

Айни пайтда Россия ҳарбийлари тинч аҳолини қатлиом қилаётганига оид ҳужжат ва далиллар сунъий йўлдошлардан ҳамда видеокузатув камераларидан олинган тасвирлар воситасида тасдиқланган.

Давомини ўқинг

XS
SM
MD
LG