Линклар

Шошилинч хабар
19 май 2022, Тошкент вақти: 10:58

Халқаро хабарлар

Эрон жануби-ғарбидаги зилзилада 10 киши жароҳатланди

Эрондаги зилзиладан зарар кўрган бинолардан бири.

17 февраль куни кечқурун Эроннинг жануби-ғарбий қисмидаги Сисехт шаҳри яқинида 5,6 балли зилзила юз берди. Хабарларга кўра, зилзилада камида 10 киши жароҳат олган.

Олти мингга яқин аҳолиси бўлган Сисехт пойтахт Теҳрондан 500 километр масофада жойлашган.

Fars агентлиги жароҳат олганларнинг камида иккитасининг аҳволи оғир эканини хабар қилди.

Эрон тектоник плиталар устида жойлашган бўлиб, мамлакатда тез-тез ер қимирлаб туради.

2003 йилда 6,6 балли зилзила туфайли Эроннинг жануби-шарқидаги қадимги шаҳар Бам вайрон бўлиб, камида 31 минг киши ҳалок бўлган эди.

1990 йилда содир бўлган 7,4 балли зилзила эса 40 минг киши умрига зомин бўлган.

Кун янгиликлари

Тожикистоннинг Тоғли Бадахшонидаги “аксилтеррор амалиёти”: Ҳалок бўлди - 8, яраланди - 11, асирга олинди - 70

Тожикистон Ички ишлар вазирлиги Тоғли Бадахшон мухтор вилоятида ўтказилган “аксилтеррор амалиёти” пайтида “саккиз жангари йўқ қилингани” ва “11 киши яралангани”ни маълум қилди. Маҳаллий нашрлар минтақада отишмалар давом этаётганини ёзмоқда.

Тожикистон ҳукумати 18 май куни эрталаб тоғли Бадахшонда “аксилтеррор амалиёти” бошланганини билдирган эди. Ички ишлар вазирлиги расмий билдирувида таъкидланишича, “аксилтеррор амалиёти” ўтказилишига Рушан туманида ҳарбийлар ва Хоруғ йўлини тўсишга ҳаракат қилган маҳаллий аҳоли ўртасида тўқнашув юзага келгани сабаб бўлган.

“200 кишидан иборат жиноий гуруҳ ижтимоий-сиёсий вазиятни издан чиқариш мақсадида Душанбе-Хоруғ автойўлининг Рушан туманидан ўтувчи уч қисмини ноқонуний равишда тўсиб қўйган. Жиноий гуруҳлар бу йўлни хориждан қурол ва ўқ-дори етказиб берилишини таъминлаш мақсадида тўсиб қўйишни режалаштириб келган. Бир марта огоҳлантириш берилганига қарамасдан жиноий гуруҳ аъзолари қуролларини ташлашдан бош тортди ва конституциявий тузумга қарши ҳаракатини давом эттирди. Сўнгра улар террорчиликка ўтишди. Фуқаролар хавфсизлиги ва жамоат тартибини сақлаш мақсадида ҳуқуқ-тартибот органлари аксилтеррор амалиётини бошлади. Натижада террорчи гуруҳнинг 8 жангариси йўқ қилинди, 11 нафари ярадор бўлди, 70 нафари асирга олинди. Жабрланганлар орасида маҳаллий аҳоли йўқ эканини алоҳида таъкидлаймиз”,-дейилади Ички ишлар вазирлиги расмий билдирувида.

Амалиёт пайтида Тожикистон хавфсизлик кучларининг бир зобити ҳалок бўлган ва 13 нафари яраланган.

Аввалроқ Pamir Daily News нашри Телеграм-каналида хавфсизлик кучлари билан маҳаллий аҳоли ўртасида отишма содир этилганини ёзган. Нашр маҳаллий аҳолига таянган ҳолда бир вертолёт уриб туширилганини, ўнга яқин киши ҳалок бўлганини билдирган.

Ички ишлар вазирлиги бу воқеага чет элдан келган кучлар аралашганини, жиноий гуруҳга қурол чет элдан етказиб берилганини, террор ва провокация ҳаракатларини амалга ошириш учун жангарилар ёлланганини маълум қилмоқда.

16 май оқшомида Тоғли Бадахшон мухтор вилоятида маҳаллий ҳуқуқ-тартибот идоралари ходимлари Хоруғдаги норозилик намойиши иштирокчиларига қарши резина ўқлар ва кўздан ёш сиздирувчи газ қўллаган эди. Озодлик тожик хизматининг ўз манбалари сўзларига таянган ҳолда хабар қилишича, ҳодиса чоғида бир киши нобуд бўлган, уч киши тан жароҳати олган.

Хабарга мувофиқ, душанба кунги акцияни тарқатиш чоғида 30 ёшли Замир Назаршоев вафот этган. Бошқа тафсилотлар ҳозирча маълум эмас.
Хоруғдаги митинг расмийлар мухтор вилоят раҳбари Алишер Мирзонабот ва шаҳар мэри Ризо Назарзодани истеъфога чиқариш, вилоятдаги барча блокпостларни олиб ташлаш ҳамда бадахшонликларни таъқиб қилишни тўхтатишга оид талабларни кўриб чиқишни рад этишгани ортидан бошланган.

Қирғизистон: Қишлоқ мактабининг шифти ўпирилиб тушди, ўқитувчи ва уч ўқувчи касалхонага ётқизилди

Шифти қулаган синфда 3-синф ўқувчилари ўқиган.

Жалолобод вилояти Чотқол тумани Тераксой қишлоғидаги Амирабек Чимканаев номидаги 18- ўрта мактаб шифти дарс пайтида қулаб тушди. Бу пайтда синфда 16 ўқувчи бўлган. Воқеа ортидан уларнинг барчаси касалхонага олиб борилган. Текширувдан сўнг бир ўқитувчи ва уч ўқувчи касалхонага ётқизилди. Қолганларига эса текширувдан сўнг уйларига кетишга рухсат берилди.

Воқеа 17 май кундузги соат 12 лар чамасида юз берган. Мактаб директори Сарақан Қўйчуманқулова шифти қулаган ҳонада дарс пайти 16 ўқувчи ва бир ўқитувчи бўлганини билдирди.

Воқеадан кейин синфдагиларни бошқа ўқитувчилар хавфсиз жойга олиб чиқиб, биринчи тиббий ёрдам кўрсатган. Қўйчуманқулованинг айтишича, томи қулаган хонада 3-синф ўқувчилари бўлган:

“Кабинетим ёнидаги синф хонасида бўлди. Бир нарса дуп этип қулагандай бўлди, қарасам синф ойнасидан чанг чиқяпти. Ўқитувчи устидан тушгани учун у қаттиқ қўрқиб кетибди, қон босими кўтарилибди, шифокорлар биринчи тиббий ёрдамни кўрсатишди. Ҳозир ўқитувчимизнинг аҳволи яҳши. Ўқувчилар эса шок ҳолатига тушиб қолган. Худога шукур, жиддий жароҳат олганлар йўқ”.

Ўзини Наргиза деб таништирган ўқувчилардан бирининг онаси қизининг саломатлиги яхши эканини айтди:

“Худо сақлабди. Қизимнинг, болаларнинг саломатлиги яхши экан. Касалхонада қарашяпти”.

Чотқол туман маориф бўлими раҳбари Тажибай Тинишовнинг айтишича, мактаб иморати эски бўлгани билан Фавқулодда вазиятлар вазирлиги томонидан авария аҳволида деб топилмаган:

“Ўзи эски мактаб. Бироқ, Фавқулодда вазиятлар вазирлиги ҳавфли деб рўйхатга олмаган. Чотқол туманида Фавқулодда вазиятлар вазирлиги қарори билан уч мактаб авария ҳолатида. Уларнинг иккитасини янгилаш ҳаракати кетяпти”.

16 ўқувчи билан ўқитувчининг саломатлигини Олабуқа ҳудудий касалхонаси шифокорлари текширдилар.

Соғлиқни сақлаш вазирлиги 17 майда ўқитувчи ва уч нафар ўқувчи касалҳонага ётқизилганини, уларнинг аҳволи қаноатланарли эканини айтди.

“Болалар касалхонага ўзлари юриб келди. 14 ўқувчи ва бир ўқитувчи келди. Аҳволлари яхши, шифокорлар назоратидан ўтишяпти”,- деди Олабуқа ҳудудий касалхонаси раҳбари Бақтигул Алибаева.

Воқеа жойидан олинган суратда 3-синф ўқувчиларининг ўқув қуроллари ва парталари тупроқ остида қолганини кўриш мумкин.

Ҳукумат воқеа юзасидан йиғин ўтказиб, тегишли ташкилотларга барча мактабгача тарбия ва умумий билим бериш идоралари биноларининг аҳволини текширишни топширди.

Парламент депутати Жанар Ақаев эса, мактаб шифти қулашига мазкур ҳудудда олтин қазиш билан шуғулланувчи “Эти-Бакир Терек-Сай” ширкати қишлоқ яқинида портлатиш ишларини олиб боргани сабаб бўлган, деган маълумот мавжудлигини айтмоқда:

“Мактаб шифти портлатиш ишлари амалга оширилган пайтда қулаган. Қишлоқдан унча узоқ бўлмаган ҳудудда портлатиш ишларининг олиб борилиши нақадар қонуний? Ширкат бу иши учун сўзсиз жавбогарликка тортилиши шарт”.

Фавқулодда вазиятлар вазири ўринбосари Урматбек Шамирқанов депутатнинг бу баёнотига жавоб берар экан:, бу воқеа юзасидан махсус комиссия текширув ўтказишини маълум қилди.

“Эти Бакир Терек-Сай” компанияси депутат баёнотига муносабат билдирмади. Мазкур ширкат капиталининг 75% Туркиянинг "Эти Бакир" компаниясига, 25% Қирғизистоннинг "Қирғизолтин" очиқ ҳиссадорлик жамиятига қарашли.

Шифти қулаган икки қаватли мактаб биноси 1951-йили қурилган. У ерда айни пайтда 360дан ортиқ ўқувчи билим олади.

Тожикистон Тоғли Бадахшонда “аксилтеррор амалиёти” бошланганини билдирди

Хоруғ, 2022 йилнинг 17 майи.

Тожикистон ҳукумати 18 май куни тоғли Бадахшонда “аксилтеррор амалиёти” бошланганини билдирди. Ички ишлар вазирлиги расмий билдирувида таъкидланишича, “аксилтеррор амалиёти” ўтказилишига Рушан туманида ҳарбийлар ва Хоруғ йўлини тўсишга ҳаракат қилган маҳаллий аҳоли ўртасида тўқнашув юзага келгани сабаб бўлди.

Ҳозирча тўқнашувда жабрланганлар тўғрисида маълумот йўқ. Мустақил манбалар эса бир неча киши ярадор бўлганини айтмоқда.

Ички ишлар вазирлиги “17 май куни уюшган жиноий гуруҳ аъзолари ижтимоий-сиёсий вазиятни издан чиқариш мақсадида Душанбе-Кўлма халқаро автойўлининг бир қисмини ноқонуний равишда тўсиб қўйишди”, деб билдирди.

Вазирлик баёнотида жиноий гуруҳга оид маълумотлар айтилмаган. Бироқ вазирлик бу воқеага чет элдан келган кучлар аралашганини, жиноий гуруҳга қурол чет элдан етказиб берилганини, террор ва провокация ҳаракатларини амалга ошириш учун жангарилар ёлланганини маълум қилмоқда.

16 май оқшомида Тоғли Бадахшон мухтор вилоятида маҳаллий ҳуқуқ-тартибот идоралари ходимлари Хоруғдаги норозилик намойиши иштирокчиларига қарши резина ўқлар ва кўздан ёш сиздирувчи газ қўллаган эди. Озодлик тожик хизматининг ўз манбалари сўзларига таянган ҳолда хабар қилишича, ҳодиса чоғида бир киши нобуд бўлган, уч киши тан жароҳати олган.

Хабарга мувофиқ, душанба кунги акцияни тарқатиш чоғида 30 ёшли Замир Назаршоев вафот этган. Бошқа тафсилотлар ҳозирча маълум эмас.

Хоруғдаги митинг расмийлар мухтор вилоят раҳбари Алишер Мирзонабот ва шаҳар мэри Ризо Назарзодани истеъфога чиқариш, вилоятдаги барча блокпостларни олиб ташлаш ҳамда бадахшонликларни таъқиб қилишни тўхтатишга оид талабларни кўриб чиқишни рад этишгани ортидан бошланган.

Human Rights Watch Россия ҳарбийларининг Украинадаги жиноятларини қайдга олди

Human Rights Watch халқаро ташкилоти Россия ҳарбийларининг Украина шимолида тинч аҳолига нисбатан содир этган жиноятларини ҳужжатлаштирди.

“Настояшчее время” телеканалининг хабар беришича, HRW 10 апрелдан 10 майгача 65 кишидан гувоҳлик кўрсатмаларини олган. Бундан ташқари ташкилот вакиллари жиноятлар содир этилган жойлардан олинган ашёвий далилларни, жабрланган ва гувоҳлардан олинган фото ва видеоларни ўрганган.

Хабарда таъкидланишича, халқаро ташкилот Киев ва Чернигов вилоятларининг 17 та аҳоли пунктида 22 та қатл ва 9 та ноқонуний қотилликлар содир этилганини, 6 та ҳолатда тинч аҳоли зўравонлик оқибатида бедарак кетганини ва 7 та қийноқ ҳолати содир этилганини ҳужжатлаштирди.

Бундан ташқари 21 киши Россия ҳарбийлари томонидан ноқонуний равишда ҳибсда сақлангани ҳамда ноинсоний муносабатга дучор этилгани тўғрисида кўрсатма берган.

Россия ФХХ Кемеровода “Украина нацистлари тарафдори” бўлган “диверсант” қўлга олинганини иддао қилди

Иллюстратив сурат.

Россия Федерал хавфсизлик хизмати - ФХХ Кемеровода гўёки “Украина нацистлари тарафдори” бўлган “диверсант” қўлга олинганини иддао қилди. Расман билдирилишича, Россия фуқароси бўлган “диверсант” иккита электр узатиш линиясининг ишдан чиқарилишига алоқадор бўлган.

Хабарда айтилишича, линияларнинг ишдан чиқарилиши оқибатида Кемеровода электр таъминотида вақтинчалик узилишлар юзага келган.

ФХХ қўлга олинган шахснинг уйидан симёғочларнинг мустаҳкамлигини таъминловчи болтлар, канистрага қуйилган бензин, иккита пневматик тўппонча ва иккита жанговар ҳанжар топганини иддао қилди. ФХХга кўра, қўлга олинган шахс кундалик тутган ва унга тайёрланаётган диверсиялар тўғрисидаги маълумотларни ёзиб борган.

“Интерфакс”нинг хабар беришича,қўлга олинган шахс ўз айбини тан олган ва ҳарбий комиссариатга ўт қўйишни режалаштирганини ҳам айтиб берган

Мазкур шахсга нисбатан “Мулкни атайлабдан йўқ қилиш ёки зарар етказиш” ва “Диверсия” моддалари асосида жиноят иши очилган.

Путин билан учрашувда Эмомали Раҳмон тожик армиясини модернизация қилиш масаласини кўтарди

Владимир Путин ва Эмомали Раҳмоннинг Кремлдаги учрашувидан лавҳа, 2022 йил 16 майи

Тожикистон президенти Эмомали Раҳмон 16 май куни Россия президенти Владимир Путин билан учрашувда ўз мамлакати қуролли кучларини модернизация қилиш ва тожик-афғон чегарасидаги вазият билан боғлиқ масалаларни кўтарди. Бу ҳақда Кремль матбуот хизмати маълум қилди.

Тожикистон раҳбари Москвага КХШТга аъзо давлатлар раҳбарлари саммитида қатнашиш учун борган.

“Россия Тожикистоннинг асосий савдо-иқтисодий ҳамкори бўлиб қолаётганини таъкидлашдан мамнунман. Ўтган йили икки мамлакат ўртасида маҳсулот айланмаси салкам 45 фоизга ошди. Жорий йилнинг уч ойида ўсиш 70 фоиздан юқори бўлди”, деган Путин Тожикистон президенти билан учрашувда.

Ўз навбатида, Эмомали Раҳмон Тожикистон қуролли кучларини модернизация қилиш дастурини амалга ошириш жараёнини ҳамда тожик-афғон чегарасидаги вазиятни муҳокама қилиш истагини билдирган. “Шунингдек, долзарб халқаро ва минтақавий муаммолар бўйича ҳам фикр алмашишга тайёрман”, дея қўшимча қилган Тожикистон раҳбари.

Кремлдаги мазкур учрашувдан бир неча кун олдин Тожикистон ҳудудига Афғонистондан бир нечта снаряд ва ўқлар келиб тушган. Мазкур воқеадан сўнг Тожикистон МХДҚ Чегара қўшинлари тўлиқ жанговар шайлик ҳолатига келтирилган.

Ереванда мухолифат автоюришининг 90 дан зиёд иштирокчиси қўлга олинди

Ереванда автоюриш иштирокчиларининг қўлга олиниши, 2022 йил 16 майи

Ереванда мухолифат автоюришининг 91 иштирокчиси ҳибсга олинди. Бу ҳақда Озодликнинг арман хизмати хабар қилди.

Арманистон пойтахтида апрель ойи ўрталаридан бери бош вазир Николь Пашинян истеъфоси талаб қилинган намойишлар ўтказилмоқда. Оммавий норозилик Пашиняннинг халқаро ҳамжамият Арманистондан Тоғли Қорабоғ мақомига доир талабларини юмшатишни кутаётгани ҳақидаги баёнотидан сўнг бошланган. Мухолифат фикрича, арман ҳукумати Озарбайжонга ён бермоқчи.

“Интерфакс” агентлигининг ёзишича, автоюриш пойтахтнинг тўрт туманида бошланган. Режага кўра, автокарвонлар шаҳар маркази томон жуда паст тезликда ҳаракатланиб кўчаларда узун тирбандликларни вужудга келтириши керак бўлган. Бироқ полиция карвонлар йўлини тўсиб, юриш иштирокчиларини қўлга олган.

Арманистон билан Озарбайжон ўртасида Тоғли Қорабоғ бўйича ҳудудий низо ўтган асрнинг 80-йиллари охирларидан бери давом этиб келмоқда. Асосан этник арманлар истиқомат қилган Тоғли Қорабоғ мухтор вилояти Арманистон қўллови билан Озарбайжон ССР таркибидан чиққан ва 1991 йил сентябрида “Тоғли Қорабоғ республикаси” тузилганини эълон қилган.

“Тоғли Қорабоғ республикаси”ни ҳеч бир мамлакат, жумладан, Арманистоннинг ўзи ҳам расман тан олган эмас. 1993 йили БМТ арман қўшинини Қорабоғдан олиб чиқиб кетиш ва ҳудудни Озарбайжоннинг бир қисми деб тан олиш тўғрисида резолюция қабул қилган.

2020 йил сентябр-декабрь ойларида бўлган урушда Озарбайжон Қорабоғ атрофидаги туманларни ҳамда қадимий Шуша шаҳрини қайтариб олган. Уруш якунида Қорабоғнинг айирмачилар назоратидаги қисмига Россия тинчликпарвар кучлари жойлаштирилган.

Украинада россиялик олигарх Михаил Фридманнинг 432 млн долларлик активи ҳибс этилди

Михаил Фридман

Украина ҳукумати россиялик олигарх Михаил Фридманнинг “Альфа-банк”да сақланаётган 12,4 млрд гривнадан ортиқ (416 млн доллар) қийматдаги активлари – Кипр ширкатлари қимматбаҳо қоғозларини ҳибс этди, дея маълум қилди Украина бош прокурори Ирина Венедиктова.

Бундан ташқари, унинг ушбу банк ҳисобварағидаги 469 млн гривна (15,7 млн доллар) маблағи ҳам ҳибс қилинган.

Бош прокурорга кўра, Фридман ва унинг назоратидаги тадбиркорлар “Альфа-банк” ҳамда Кипр ширкатларидан ўз маблағларини эҳтимолий санкциялардан сақлаб қолиш мақсадида фойдаланганлар. Активларни Россияга олиб чиқиб кетиш урушдан бир-икки ҳафта олдин бошланган ва уруш бошланганидан сўнг фаоллашган.

Михаил Фридман Украинада уруш бошланганидан сўнг Евроиттифоқ санкцияларига учраган илк россияликлардан биридир. ЕИ санкциялари асосланмасида унинг Путин маъмурияти билан яқин алоқада экани ва 2014 йилда Қримнинг босиб олинишига кўмаклашгани қайд этилган.

Кейинроқ Фридман Bloomberg нашрига берган интервьюсида санкциялар адолатсиз қўллангани, банк карталари блоклангани туфайли ҳатто фаррош ёллашга пули йўқлигини айтиб нолиган.

Тожикистон: Хоруғда норозилик намойиши куч билан тарқатилди, бир киши ўлди, уч киши яраланди (ВИДЕО)

Хоруғ, 2022 йил 16 майи

Тожикистоннинг Тоғли Бадахшон мухтор вилоятида (ТБМВ) маҳаллий ҳуқуқ-тартибот идоралари ходимлари 16 май оқшомида Хоруғдаги норозилик намойиши иштирокчиларига қарши резина ўқлар ва кўздан ёш сиздирувчи газ қўллаган. Озодлик тожик хизматининг ўз манбалари сўзларига таянган ҳолда хабар қилишича, ҳодиса чоғида бир киши нобуд бўлган, уч киши тан жароҳати олган.

Расмийлар ТБМВ маъмурий марказидаги акцияга оид маълумотни тасдиқлашгани ҳам, инкор этишгани ҳам йўқ.

Хабарга мувофиқ, душанба кунги акцияни тарқатиш чоғида 30 ёшли Замир Назаршоев вафот этган. Бошқа тафсилотлар ҳозирча маълум эмас.

Тожикистон: Намойиш куч билан тарқатилди, бир киши ўлди, уч киши яраланди
Илтимос кутинг

Айни дамда медиа-манба мавжуд эмас

0:00 0:02:23 0:00

Хоруғдаги митинг расмийлар ТБМВ раҳбари Алишер Мирзонабот ва шаҳар мэри Ризо Назарзодани истеъфога чиқариш, вилоятдаги барча блокпостларни олиб ташлаш ҳамда бадахшонликларни таъқиб қилишни тўхтатишга оид талабларни кўриб чиқишни рад этишгани ортидан бошланган.

Эрдўғон Финляндия ва Швециянинг НАТОга аъзо бўлишига қарши чиқмоқда

Туркия президенти Ражаб Тоййиб Эрдўғон

Туркия президенти Ражаб Тоййиб Эрдўғон 16 май куни Швеция ва Финляндия делегациялари НАТОга аъзо бўлиш учун ўз аризаларини маъқуллатиш мақсадида Анқарага келмай қўяверишлари мумкинлигини билдирди. Бу ҳақда Reuters агентлиги хабар қилди.

Душанба куни ўтказилган матбуот анжуманида Эрдўғон Туркия Финляндия ва Швециянинг НАТОга аъзо бўлишини ёқлай олмаслигини урғулаган.

“Ҳар иккала мамлакатда ҳам террор ташкилотларига нисбатан аниқ позиция мавжуд эмас. Швеция террор ташкилотларининг инкубация марказидир. Улар террорчиларни парламентга олиб келишиб, минбар беришади, уларга турли махсус таклифномалар йўллашади”, деган Туркия президенти.

Анқара фикрича, Швеция ва Финляндия Курдистон ишчи партияси жангарилари ва Фатҳуллоҳ Гулен издошлари (улар 2016 йилдаги давлат тўнтаришига уринишда айбланишади) билан алоқадор шахсларни яшириб ўтирибди. Туркия бу икки ташкилотни террор ташкилоти деб ҳисоблайди.

НАТОга кириш учун альянснинг барча аъзолари аризани дастаклаши лозим.

Швеция ва Финляндия ҳукуматлари НАТОга кириш қарорига шу йил февралида Россия қўшинлари Украина ҳудудига бостириб киргани ортидан келишган.

Россия Украина шарқида янги ҳужумларга тайёргарлик кўрмоқда, НАТО Украина ғалаба қозонишини башорат қилмоқда

Украина аскарлари.

Украина ҳукумати мамлакатнинг иккинчи йирик шаҳри бўлган Харьков атрофида Россия армиясига қақшатқич зарбалар беришда давом этаётганини маълум қилди. Айни пайтда президент Владимир Зеленский 15 май куни кечқурун берган баёнотида Россия қўшини Донбассни тўлиқ назоратига олиш учун янги ҳужумларга тайёрланаётганини айтди:

“Биз Россиянинг Донбассга уюштирадиган янги ҳужумларини қайтаришга тайёргарлик кўрмоқдамиз. Оккупантлар ҳалигача боши берк кўчага кириб қолганларини, улар “махсус амалиёт” деб атаётган операция аллақачон банкрот бўлганини англай олмаяптилар”,-деди Зеленский.

Украина президенти маслаҳатчиси Алексей Арестович Харьковдан чекинган рус бўлинмалари Донбасс йўналишига ташланаётганини билдирди.

НАТО Бош котиби Йенс Столтенберг ташкилотга аъзо давлатлар расмийлари билан 15 май куни Берлинда ўтказган учрашувда “Уруш Москва режалаштирганидек бўлмаяпти”, деб айтди ва давлатларни Украинага ҳарбий кўмакни кучайтиришга чақирди.

16 май куни НАТО Эстонияда кенг кўламли ҳарбий ўқув машғулотларини бошлайди. Шу куни Брюсселда Европа Иттифқи ташқи ишлар вазирлари Украинадаги вазиятни муҳокама қилади. Мазкур учрашувда Россияга нисбатан янги санкциялар жорий этиш масаласи кўриб чиқилади.

Bloomberg: Германия Россия нефтидан йил охирига қадар воз кечади

Германия Россия нефти импортидан йил охиригача воз кечади, ҳатто Евроиттифоқ мамлакатлари Россияга қарши санкцияларнинг олтинчи туркуми доирасида ёқилғи сотиб олишни тақиқлаш бўйича тил топиша олмаган тақдирда ҳам, дея хабар қилди Bloomberg.

Нашр манбасига кўра, ГФР ҳукумати олти-етти ой мобайнида муқобил таъминотчи масаласини ҳал қила оламиз, деб ҳисоблайди. Айнан қайси мамлакатлар Германиянинг нефтга эҳтиёжини қондириши мумкинлиги ҳозирча очиқланмаган.

Германия иқтисодиёт вазирлигига кўра, Россия Украинада уруш бошлаганидан бери Россиянинг Германияга нефть етказиб беришдаги улуши 35 фоиздан 12 фоизга камайган.

Энг катта муаммолардан бири Шведт шаҳрида жойлашган Европадаги энг йирик нефтни қайта ишлаш заводига хомашё етказиб бериш масаласидир. “Роснефть” назоратидаги ушбу завод, хусусан, Берлин халқаро аэропортини ёқилғи билан таъминлайди. Bloomberg ва Reuters маълумотига кўра, ҳукумат заводни ўз назоратига олиш имкониятини кўриб чиқмоқда.

ЕИ мамлакатлари 8 майдаги учрашувда Россияга қарши санкциялар янги туркуми хусусида келишувга эриша олмаган. Россия нефти импорти ва транспортировкасига чеклов қўйиш ташаббусини ҳозирча Венгрия “ўтказмаяпти”.

Санкцияларнинг олтинчи туркуми, жумладан, Россия нефтини харид қилиш ва ташишга тақиқ қўйишни назарда тутади. Санкциялар лойиҳасида Россия ёқилғисига қаттиқ тобе бўлмиш Венгрия, Чехия ва Словакия учун истиснолар таклиф этилганди. Бироқ Венгрия ҳукумати бу “юмшатиш” етарли эмас деб ҳисоблаб, бошқа мамлакатлардан нефть сотиб олишга ўтиш сарф-харажатларини қоплаб беришни талаб қилмоқда.

Олтинчи санкциялар туркуми маъқулланиши учун уни Евроиттифоқнинг барча мамлакатлари дастаклаши лозим. Бу масала ЕИ мамлакатлари ташқи ишлар вазирлари йиғилишида бугун, яъни 16 май куни муҳокама қилинади.

Россиянинг АҚШдаги элчиси: “Биз чекинмаймиз”

Анатолий Антонов

Россиянинг АҚШдаги элчиси Анатолий Антонов Россия Украинада “таслим бўлмаслиги”га ишончи комиллигини айтди. Унга кўра, Россиянинг АҚШдаги дипломатлари “олий бош қўмондон қуролли кучлар олдига қўйган барча вазифалар тўла-тўкис адо этилади”, дея ишонадилар.

“Соловьёв Live” телеканали ёйинида сўзлаган Антоновга кўра, АҚШ Россияни сулҳ музокараларига “ундамоқда”, аммо фақат ўз шартларини тиқиштиряпти. Элчининг иддаосича, Россияга учта шарт қўйилган: Украинада ҳарбий ҳаракатларни тўхтатиш, қўшинларни 24 февралгача эгаллаб турилган позицияларга қайтариш, шунингдек, “барча қилмишига тавба қилиш”. Элчи Антонов: “Бунақа капитуляция бўлган эмас, ҳеч қачон бўлмайди. Биз асло таслим бўлмаймиз, чекинмаймиз”, деган.

Элчи АҚШ Россия билан мулоқотни “боши берк кўчага тиқиб қўйган”идан, шунингдек Вашингтондаги элчихона ходимлари билан юзма-юз кўришувларни тўхтатганидан нолиган.

Россия Украинага бостириб кирган кундан бери Қўшма Штатлар Москвани ўт очишни тўхтатишга ва қўшинларини олиб чиқиб кетишга чақирмоқда. Шунингдек, АҚШ Украинанинг мустақиллиги ва ҳудудий яхлитлигини дастаклашини билдириб, Киевга катта ёрдам беряпти. Шу билан бирга, Россияга “таслим бўлиш” талаби илгари сурилаётган эмас. АҚШ мазкур можаро музокаралар йўли билан бартараф этилишини, аммо бу Россия тарафининг диктати асосида бўлмаслиги кераклигини урғулаб келади.

Кремль Украина шарқидаги ўзини “ДХР” ва “ЛХР” деб атаётган айирмачи республикалар мустақиллигини тан олишидан ва Украинага ҳужум қилишидан бир кун олдин элчи Антонов “Донбасс ва Луганск Украинанинг бир қисми эканини тасдиқламоқчи эдим”, деб айтган ҳамда Россиянинг Украинага бостириб кириш ва унинг ҳудудларини ишғол этиш режаси йўқлигини иддао қилган.

“Азовсталь” заводидаги ярадорларнинг аҳволи кундан-кунга оғирлашяпти

"Азовстал"даги ярадор жангчилардан бири

Россия ҳарбийлари қамалда ушлаб турган “Азовсталь” заводи ҳудудида украиналик қарийб 600 чоғли ярадор жангчи бор. Бу ҳақда миллий телемарафон ёйинида Украин Миллий гвардиясининг 12-оператив бригадаси командири Денис Шлега маълум қилди.

Унинг айтишича, юзлаб ярадорлардан тақрибан 40 нафари жуда оғир аҳволда. Шлега дори-дармон ва тиббиёт ускуналари “жуда танқис”лигини урғулаб, вазиятни у “мураккаб” дея баҳолади, дея хабар қилди Озодликнинг украин хизмати.

Таъкидланишича, ушбу маълумотни 15 май куни ўтказилган матбуот анжуманида “Азовсталь” мудофаачиларининг рафиқалари ҳам тасдиқлаган. Улар эрлари кунига бир стакандан техник сув ичишаётгани, озиқ-овқат захираси жуда камлигини айтганлар. Оғир ярадор жангчилар орасида дори-дармон йўқлигидан ўлаётганлар кўп, наркоз бермасдан ампутация қилинган ҳоллар бўлган, дейишган анжуман иштирокчилари.

Жангчиларнинг аёллари президент Эрдўғон билан учрашиш ва ундан эрларига ёрдамлашишини илтимос қилиш учун Туркияга боришмоқчи.

“Настояшчее время” телеканали “Азов” полки жангчиси Дмитрий Козацкий билан боғланган. У ҳам “Азовстал”даги 600-700 чоғли ярадор аскардан 40-50 нафари “ўта оғир аҳволда”лиги ва шошилинч эвакуацияга муҳтожлигини таъкидлаган.

“Сув ва егулик беш кун ёки бир ҳафталик қолди. Кунда бир маҳал – фақат тушда овқатланяпмиз. Бугун сули бўтқаси билан озгинадан сабзи едик”, деган Козацкий.

Штурм ҳақида тўхталаркан, Козацкий жанг ҳаракатлари аллақачон завод ҳудудида кечаётганини билдирган. “Душман ҳужумни оғир артиллерия, танклар ва авиация билан дастаклаб турибди. Жангчиларимиз ёв ҳамлаларининг барчасини максимум даражада қайтармоқда”, деган “Азов” полки жангчиси.

АҚШ: Буффалода ирқий нафрат асосида амалга оширилган ҳужумда 10 киши қурбон бўлди

АҚШнинг Нью-Йорк штатида жойлашган Буффало шаҳридаги супермаркетда уюштирилган ҳужум натижасида 10 киши нобуд бўлди, яна уч киши тан жароҳати олди. Ҳодиса ортидан полиция 18 яшар йигитни қўлга олган. CNN хабарига кўра, у мазкур жиноятни ирқий нафрат асосида амалга оширган тахмин қилинмоқда.

CBS телеканалининг полициядан олинган маълумотга таянган ҳолда хабар қилишича, милтиқ билан қуролланган одам 14 май куни маҳаллий вақт билан соат 14:30 ларда Tops Friendly Markets дўконига кирган. У ёнидаги камера билан жиноятни Twitch’да трансляция қилиб борган.

Буффало полицияси комиссари Жозеф Грамальяга кўра, гумонланувчи тураргоҳдаёқ ўт очиб, уч кишини ўлдирган ва бир кишини яралаган. Шундан кейин у супермаркетга кирган. У ерда қўриқчилик қилган истеъфодаги полиция ходими ҳужумчига қарата бир неча марта ўқ узган, бироқ уни зирҳ камзули ва бошидаги каскаси сақлаб қолган. Кейин ҳужумчи қўриқчини ўлдирган.

Грамальянинг айтишича, пировардида гумонланувчи дўкон эшиги олдига қайтган ва полиция билан тўқнаш келган. У қуролини ўз бўйнига тақаган, бироқ куч ишлатар тузилмалар ходимлари ҳужумчини таслим бўлишга кўндириб, қўлга олишган.

CNNнинг ёзишича, гумонланувчининг исми Пэйтон Гендрон бўлиб, у отишмадан кейин ўзига қўйилаётган қотиллик айбловини тан олмаяпти. Суд ҳужумчига суд-тиббий экспертиза тайинлаган. Ҳужумчининг айби исботланган тақдирда, у умрбод қамоқ жазосига маҳкум этилиши мумкин.

Округ прокурори Эри Жон Флинн ҳужумчи Гендрон Буфаллога Конклиндан келганини қайд этган. Гумонланувчи қасддан асосан афроамерикаликлар истиқомат қиладиган мавзега йўл олгани тахмин қилинмоқда.

Расмийлар фикрича, жиноят ирқий нафрат асосида содир этилган – 13 қурбондан 11 нафари афроамерикалик бўлган.

CBS манбаларига кўра, гумонланувчи одамларни отаётган пайтда ирқий таҳқирлашга оид сўзлардан фойдаланган. Милтиқ қўндоғига Гендрон 77 киши отиб ўлдирган норвегиялик неонацист Андрес Брейвик ҳамда Янги Зеландиянинг Крайстчерч шаҳрида масжидларни нишонга олиб, асосан мусулмонлардан иборат 51 кишини ўлдирган Брентон Таррант номларини ёзиб олган. Уларнинг иккаласи ҳам кейинроқ умрбод қамоқ жазосига ҳукм этилган эди.

Давомини ўқинг

XS
SM
MD
LG