Линклар

Шошилинч хабар
31 март 2020, Тошкент вақти: 13:05

Ўзбекистон хабарлари

Эрдўғон Мирзиёев октябрь ойида Туркияга келишини билдирди

Президент Мирзиёев Туркия раҳбари Эрдўғон билан.

Президент Шавкат Мирзиёев октябрь ойида Туркияга боришни режалаштирмоқда.

Бу ҳақда Туркия президенти Режаб Тоййип Эрдўғоннинг Ўзбекистон мустақиллигининг 26 йилллиги муносабати билан Мирзиёевга йўллаган мактубидан маълум бўлди.

АН Podrobno.uz нашрининг хабар беришича, Эрдўғон ўз мактубида "2017 йилда -давлатларимиз ўртасида дипломатик алоқалар ўрнатилганлигининг 25 йиллигида- ўзаро алоқаларимиз сезиларли даражада жонланди. Ўтган йилнинг ноябрида Самарқандда бўлиб ўтган учрашувимиз бу борада бурилиш нуқтаси бўлди... Ишонаманки, Сизнинг Туркияга жорий йилнинг октябрида амалга оширадиган сафарингиз икки томонлама ҳамкорликнинг ҳозирги даражасини янги даражага кўтаради”, деб ёзган.

Эрдўғон ўз мактубида Ўзбекистон халқини Мустақиллик байрами билан чин дилдан қутлаган.

Айни пайтда Ўзбекистон ва Туркия ўртасидаги товар айрибошлаш ҳажми 1,2 миллиард долларни ташкил қилади. Томонлар бу кўрсаткич икки давлат потенциалидан паст даражада эканини билдириб келадилар.

Шу кунгача Туркиянинг қурилиш ширкатлари Ўзбекистонда умумий қиймати 2 миллиард доллар бўлган 110та лойиҳани амалга оширган. Туркия ширкатларининг Ўзбекистон иқтисодиётига киритган сармояси эса 1,2 миллиард долларни ташкил қилади.

Кун янгиликлари

Коронавирусга чалинганлар сони яна 8 нафарга кўпайди. Беморлар сони 158 нафарга етди

31 март куни коронавирусга чалинганлар Наманган, Навоий ва Тошкентдан.

31 март куни Ўзбекистонда коронавирусга чалинган яна 8 одам аниқланди. Бу билан мазкур вирусга чалинганлар сони 158 нафарга етди.

“Ушбу инфекция шу йилнинг 12 мартида Туркияда бўлиб, касаллиги тасдиқланган бемор билан яқин мулоқотда бўлган 2 нафар наманганлик, иккинчи марҳум билан яқин мулоқотда бўлган асли навоийлик 2 нафар кишида, яъни она ва болада, шунингдек, беморлар билан мулоқотда бўлган 4 нафар тошкентлик фуқарода аниқланди”, дейилади Соғлиқни сақлаш вазирлиги баёнотида.

31 март куни эрталаб Ўзбекистонда коронавирус инфекцияси билан касалланганлар сони 1 тага ошиб, 150 нафарни ташкил этгани хабар қилинганди. Ушбу инфекция 1 нафар тошкентлик фуқарода аниқланди.

30 март куни Ўзбекистонда коронавирус инфекцияси билан касалланганлар сони 4 тага ошиб, 149 нафарга етгани хабар қилинганди.

30 март куни инфекция 2 нафар андижонлик (аёллар), 1 нафар фарғоналик (эркак) ва 1 нафар тошкентлик (эркак) фуқароларда аниқланган.

Ўзбекистонда 2 бемор вафот этди, 7 бемор тузалиб, реабилитация марказига ўтказилди.

Ўзбекистонда Тошкент шаҳри, Тошкент, Фарғона, Наманган, Андижон, Бухоро, Хоразм ва Қашқадарё вилоятларида коронавирус қайд этилган.

Пандемия даврида аҳолининг бир қисмига ва тадбиркорларга имтиёзлар берилиши кутилмоқда

Ўзбекистонда коронавирусга чалинганлар сони 150 нафарга етди.

Ўзбекистон президенти коронавирус пандемиясига оид яна бир фармонни имзолаши режалаштирилмоқда. Ҳужжат пандемиянинг иқтисодиётга ва аҳоли турмуш даражасига салбий таъсирини юмшатишга қаратилган навбатдаги имтиёзлар, преференциялар ва бошқа муҳим чора-тадбирларни назарда тутади.

Президент матбуот хизматининг 30 мартда билдиришича, айни пайтда “Коронавирус пандемияси даврида аҳолини, иқтисодиёт тармоқлари ва тадбиркорлик субъектларини қўллаб-қувватлашга доир қўшимча чора-тадбирлар тўғрисида”ги фармони лойиҳаси тайёрланиб, муҳокама қилинмоқда.

“Президентимиз фармон лойиҳасига ёлғиз қариялар, ногиронлиги бўлган шахслар ва кам таъминланган оилалар ижтимоий ҳимоясини кучайтириш, озиқ-овқат, дори-дармон маҳсулотларини кўпайтириш ва нархлари ошишига йўл қўймаслик, тадбиркорлик субъектларининг айланма маблағлари камайиб кетишининг олдини олиш, уларга қўшимча солиқ имтиёзлари тақдим этиш каби бир қатор аниқ чораларни киритиш зарурлиги ҳақида масъулларга топшириқ берди”, дейилади расмий хабарда.

Лойиҳа президент топшириғига асосан ишлаб чиқилган бўлиб, Ўзбекистон Республикаси Президентининг 2020 йил 19 мартдаги ПФ–5969-сон “Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида”ги фармонининг мантиқий давоми ҳисобланади.

Туркиядан олиб келинган олма кўчатлари ёқиб ташланди. Кўчатлар сақланган ҳудуд карантинга олинди

Туркиядан импорт қилинган 23 200 дона олма кўчатида «Бўртма нематода» зарарли организми мавжудлиги аниқланган.

Туркиядан Ўзбекистонга олиб келинган 23 минг туппдан кўпроқ зарарли олма кўчати ёқиб юборилди. Бу ҳақда «Ўздавкарантин» ахборот хизмати 30 март куни хабар берди.

Хабарда айтилишича, Бухоро вилоятининг «Бухоро 2 ТИФ» Ўсимликлар карантини чегара масканида Туркиядан импорт қилинган 23 200 дона олма кўчатида «Бўртма нематода» зарарли организми мавжудлиги аниқланган.

“Таъкидланишича, ушбу илдиз бўртма нематода помидор, бодринг, сабзи, пиёз, ғўза экинлари, гилос, ўрик ва бошқа турдаги мевали дарахтларни кучли зарарлайди. Личинкаларининг ривожланиши натижасида ўсимлик бутунлай нобуд бўлади”, дейилади расмий маълумотда.

«Ўздавкарантин» инспекциясининг тақдимномасига мувофиқ, олма кўчатлари келтирилган ҳудудда карантин ҳолати эълон қилинди.

Бухоро вилоят Экология ва атроф-муҳитни муҳофаза қилиш бошқармасининг махсус полигонида тегишли ташкилотларнинг масъул ходимлари иштирокида олма кўчатлари ёқиш йўли билан йўқ қилинди.

Иккинчи жаҳон уруши қатнашчиларига жорий йилда 10 миллион сўмдан мукофот пули берилади

Ўзбекистонда 2017 йилдан бошлаб "Ғалаба куни" нишонлана бошлаган эди.

Иккинчи жаҳон уруши қатнашчилари ва ногиронларига ўн миллион сўм миқдорида бир йўла пул мукофоти берилади. Бу борадаги фармонни президент Шавкат Мирзиёев 30 март куни имзолади.

Фармон “фашизм устидан қозонилган ғалабанинг 75 йиллиги нишонланиши муносабати билан уруш қатнашчилари ва ногиронларини моддий рағбатлантириш мақсадида” қабул қилинган.

Иккинчи жаҳон уруши қатнашчилари ва ногиронларига пул мукофотлари 9 май–Хотира ва қадрлаш куни арафасида Мудофаа вазирлиги, Маҳалла ва оилани қўллаб-қувватлаш вазирлиги, Ички ишлар вазирлиги, Давлат хавфсизлик хизмати Молия вазирлиги, Марказий банк, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда тантанали равишда топширилади.

2019 йилда Иккинчи жаҳон уруши қатнашчиларига 7,5 миллион сўм, 2018 йилда 5 миллион сўм, 2017 йилда эса 2 миллион сўмдан пул мукофотлари топширилганди.

2019 йилда эълон қилинган маълумотда Ўзбекистонда 878 нафар уруш қатнашчиси яшаётгани айтилган.

Иккинчи жаҳон урушида Ўзбекистонда яшаган 6,5 миллион аҳолининг 1,5 миллиони фронтга кетган, улардан 420 минги қайтиб келмаган, 640 минги яраланган.

Уруш йилларида хавфли ҳудудлардан эвакуация қилинган 1,5 миллион одам, жумладан, 300 минг етим қолган болани Ўзбекистон очлик ва ўлимдан сақлаб қолган.

Фарғона ва Андижон вилоят ҳокимлари Ўшга ёрдам жўнатди

Ўшга ёрдам юбориш тўғрисида Бош вазир Абдулла Арипов топшириқ бергани айтилди.

Ўзбекистон Қирғизистонга индивидуал ҳимоя воситалари ва экспресс-тестлардан иборат ёрдам жўнатди.

Turmush.kg нашрининг ёзишича, Бош вазир Абдулла Арипов топшириғига асосан кўрсатилган ёрдам 29 март куни Ўшга етказиб берилди.

Хабарда айтилишича, 10 мингта тиббиёт маскаси ва 900та ҳимоя костюми Фарғона вилояти ҳокими Шуҳрат Ғаниев томонидан, 4800та экспресс-тестлар ва регаентлар Андижон вилояти ҳокими Шуҳрат Абдураҳмонов томонидан жўнатилган.

Ушбу воситалар назорат остидаги ҳудудларга коронавирусга қарши таҳлилларни олиш учун юборилади. Ҳимоя воситалари эса тиббиёт ходимларига тарқатилади.

31 март ҳолатига кўра, Қирғизистонда коронавирус юқтирган беморлар сони 94 нафарга етган.

Кореялик профессор коронавирусга қарши кураш доирасида Ўзбекистонга таклиф этилди

Цой Чже Ук Корея тиббиёт ассоциацияси илмий-текшириш қўмитаси раиси. Сурат Соғлиқни сақлаш вазирлиги сайтидан олинди.

Корея Республикасининг Корё университети профессори Цой Чже Ук коронавирусга қарши кураш методологиясини уйғунлаштириш доирасида халқаро эксперт сифатида Ўзбекистонга таклиф этилди. У 30 март кунидан бошлаб Соғлиқни сақлаш вазирлигида иш бошлади.

Соғлиқни сақлаш вазирлигининг 30 март куни билдиришича, Цой Чже Укдан “бугун ва эртага қандай чора-тадбирларни амалга ошириш юзасидан маслаҳат олинади". Бундан ташқари “ҳамкорликда ишни ташкил қилиш ҳамда дунё ва Корея Республикаси тажрибаси билан мамлакатимизда қўлланилаётган коронавирусга қарши курашиш бўйича бугунги методологияни уйғунлаштириш” назарда тутилган.

Корё университети профессори Цой Чже Ук Корея тиббиёт ассоциацияси илмий-текшириш қўмитаси раиси, ушбу ассоциациянинг коронавирусга қарши курашиш бўйича штаби етакчи маслаҳатчисидир.

31 март ҳолатига кўра, Ўзбекистонда коронавирус инфекцияси билан касалланганлар сони 1 тага ошиб, 150 нафарни ташкил этмоқда.

Коронавирусга чалинганлар сони 150 нафарга етди

Жаҳонда коронавирусга чалинганлар сони 725 мингдан ошди.

31 март ҳолатига кўра, Ўзбекистонда коронавирус инфекцияси билан касалланганлар сони 1 тага ошиб, 150 нафарни ташкил этмоқда.

Ушбу инфекция 1 нафар тошкентлик фуқарода аниқланди.

30 март куни Ўзбекистонда коронавирус инфекцияси билан касалланганлар сони 4 тага ошиб, 149 нафарга етгани хабар қилинганди.

30 март куни инфекция 2 нафар андижонлик (аёллар), 1 нафар фарғоналик (эркак) ва 1 нафар тошкентлик (эркак) фуқароларда аниқланган.

Шунингдек, қашқадарёлик 14 яшар бемор COVID-19 билан вилоят юқумли касалликлар шифохонасига ётқизилгани ҳам маълум қилинган.

Ўзбекистонда Тошкент шаҳри, Тошкент, Фарғона, Наманган, Андижон, Бухоро, Хоразм ва Қашқадарё вилоятларида коронавирус қайд этилган.

Дунёда вирус юқтирганлар расмий сони эса 765 мингдан, ўлганлар сони эса 34 мингдан ошди. Тузалганлар 152 минг атрофида.

Марказий банк 10 мингга яқин кредит муддати узайтирилганини маълум қилди

Марказий банк биноси

АОКА ҳузуридаги штабда Марказий банк бошқарма бошлиғи Ҳусанхўжа Абидов иштирокида брифинг ўтказилди.

Унинг айтишича, ҳозирда кредит бериш амалиётлари тўхтатилмаган, банклар томонидан барча турдаги кредитлар ажратиб келинмоқда.

Абидовга кўра, вазиятдан келиб чиқиб, банклар мавжуд кредитлар муддатини узайтириб, қарз юкларини камайтирган.

"Маълумот учун, 10 мингга яқин кредитлар муддати узайтирилди", деди Абидов.

Брифингда мулозимга: "Барча пулларим пластик карточкада. Шаҳарда эса терминал йўқ. Пулларимни қандай нақд қилсам бўлади?" деган савол берилди.

Марказий банк мулозими: "транспорт чекловларига қарамай, шаҳардаги барча банкоматлар ишлари тўхтатилмаган ва улар етарли миқдорда пул маблағлари билан тўлдирилган. Бугунги кунда 5 мингдан ортиқ банкоматлар ишлаб турибди ва улардан ўз пулларингизни нақдлаштириб олишингиз мумкин", деб жавоб берди.

Қуйида Марказий банк бошқарма бошлиғи Ҳусанхўжа Абидов иштирокида брифингни тўлиқ томоша қилишингиз мумкин:

Чекка ҳудудлардаги аҳоли учун зарур дориларни дорихоналар уйига етказиб бериши айтилди

АОКА ҳузуридаги штабда Вазирлар Маҳкамаси ҳузуридаги санитария-эпидемиология назорати давлат инспекцияси бошлиғи Нурмат Отабеков иштирокида брифинг ўтказди.

Отабековга Ўзбекистондаги қатор вилоятлар ва қарийб барча йирик шаҳарларда ҳаракатланиш чекланган, хусусий автомобиллардан фойдаланиш тўхтаган бир пайтда касаллар шифохонага қандай етиб олиши мумкинлиги ҳақида сўралди.

Отабековга кўра, бунинг бир йўли бор - шифокорни чақириш:

"Бундай вазиятда шифокорни чақирсангиз улар уйингизга келишади, зарур ҳолатда тез ёрдам машинасида шифохонага етказилади".

Бундан ташқари, чекка туман ва қишлоқлар аҳлига кундалик зарур дори воситаларини дорихоналар етказиб беришини таъкидлади.

Коронавирусга қарши курашга қўшилиш истагини билдирган тиббиёт ходимларига эса захирадаги шифокор ва тиббиёт персоналлар рўйхатига ёзилишни, 14 кунда шифокорлар гуруҳи алмашаётгани боис, уларга эҳтиёж борлигини айтди.

Шунингдек, Отабековдан вакцина чет мамлакатларда яратилса у Ўзбекистонга қанчада келиши мумкинлиги ҳақида сўралди.

Нурмат Отабеков: "Вакцина даволаш воситаси эмас. Вакцинация профилактика мақсадида амалга оширилади. Мабодо вакцина ишлаб чиқарилиб, Жаҳон соғлиқни сақлаш ташкилоти томонидан ушбу вакцинани самарали деб топиб, кенг жамоатчиликни эмлаш календари ёки эпидемик кўрсатмага асосан эмлаш лозим деб топилса, шунга қараб кейинги тактика белгиланади", деб жавоб берди.

Брифингни тўлиқ қуйида томоша қилишингиз мумкин:

Юнусободда ими-жимида "куёвнавкар чақириш" маросимини қилган ота устидан жиноят иши очилди

ИИВ ходимлари аҳоли ўртасида тушунтириш ишларини олиб бормоқда, 25 март, 2020

АОКА ҳузуридаги штабда Ички ишлар вазири матбуот котиби Шуҳрат Ғиёсов бирифинг ўтказди.

Матбуот котибига мамлакатда автотранспорт воситалари ҳаракатининг чекланиши, тўйлар ва карантин қоидаларига риоя қилиниши бўйича саволлар берилди.

Ғиёсовнинг маълум қилишича, 28 март куни Тошкент шаҳри, Юнусобод туманида “куёв навкар” маросимини ўтказган отага нисбатан жиноят иши очилган.

Матбуот котибига кўра, яшовчи 1965 й.т. фуқаро қизини узатиш мақсадида “куёв навкар” маросимини ўтказган. Тадбирга, ўзининг қариндошларини, куёв ва унинг дўстларини таклиф этган.

"Ваҳоланки бир кун олдин бу фуқаро профилактика инспектори ва маҳаллари раиси томонидан бундай тадбир ўтказиш карантин қоидаларини қўпол равишда бузиш эканлиги билан, расмий равишда тилхат олиб огоҳлантирилган", деб маълум қилди Ғиёсов.

Аммо, огоҳлантирувга амал қилмагани учун бу шахсга Жиноят кодексининг 257 прим 1-моддаси, яъни эпидемияга қарши кураш қоидаларини бузиш билан жиноят иши қўзғатилгани маълум қилинди.

Ғиёсовга кўра, бу шаклда - “ими-жимида” тўй маросими ёки бошқа йиғинларни ўтказиш тақиқланган. Агар ички ишлар органлари тўй ёки бошқа маросимларни ўтказилаётганини аниқласа, шахс жиноий жавобгарликка тортилади.

Айни пайтда, ИИВ матбуот котиби дафн маросимлари бундан мустасно эканини қўшимча қилди.

Шунингдек, Ғиёсов хаста одамни шифохонага олиб бориш зарурати туғилса, фуқаролар шахсий автомобилидан фойдаланиши мумкинлиги ва буни ИИВ ходимларига тушунтириши кераклигини айтди.

30 март ҳолатига кўра, Ўзбекистонда 2 бемор вафот этди, 145 кишида вирус аниқланди.

7 бемор тузалиб, реабилитация марказига ўтказилди.

Барча вилоятлар маркази ва йирик шаҳарлар ёпилган, 25 мартдан кўчада ниқобсиз юриш тақиқланган.

Алоҳида автотранспорт воситаларига махсус рухсатнома билан ҳаракатланишга рухсат берилди, шахсий автомобиллардан шахсий мақсадда фойдаланиш 30 мартдан тақиқланди.

Дунёда вирус юқтирганлар расмий сони эса 725 мингдан, ўлганлар сони эса 34 мингдан ошди. Тузалганлар 152 минг атрофида.

Марказий банк аҳоли ва тадбиркорларга битта мурожаатнома асосида кредит таътили беришга оид кўрсатма чиқарди

30 март куни Ўзбекистон Марказий банки коронавирус пандемияси оқибатида оғир аҳволга тушиб қолган жисмоний ва юридик шахсларнинг кредит тўлов муддатини узайтириш бўйича тижорат банкларига кўрсатма берди.

Унга кўра¸ тижорат банклари тўлов муддатини узайтиришни соддалаштирилган тартибда - фақат битта мурожаатнома асосида кўриб чиқиши лозим.

Бу мурожаатномани берувчи шахс кредит тўловларини узайтириш юзасидан асослантирилган изоҳ келтириши¸ карантин даври якунлангандан сўнг қарздорликни кредит шартномасига киритиладиган ўзгартиришларда кўзда тутилган тартибда тўлаш мажбуриятини зиммасига олиши шарт.

Айни пайтда Марказий банк “карантин даври тугагандан сўнг белгиланган муддат ичида қўшимча ҳужжатларни қонунчиликка мувофиқ расмийлаштирилмаган тақдирда кредит шартномасига киритилган ўзгаришлар кредит ташкилоти томонидан бекор қилиниши ва дастлабки шартнома шартлари кучга киришини” ҳам алоҳида таъкидлаган.

Иқтисодчи Отабек Бакиров ўз Telegram каналида Марказий банк берган тавсияси қуйидагича изоҳлади.

"​Кредит муддатини узайтириш бўйича Қарздор Таъсисчиларининг қарори, Гаровга қўювчиларнинг кредит муддатини узайтиришга розилик хатлари, Кафиллик ва суғурта полислари берган субъектларнинг розилиги каби ҳужжатлар карантин даври тугагандан кейин талаб қилинади.

Агар ушбу ҳужжатлар карантин даври ва чекловлари тугагач, Банкка тақдим этилмаса ва тегишли шартлар бажарилмаса, Банкнинг Кредит шартномаси бўйича реструктуризация қарори бир томонлама бекор қилинади".

Ўзбекистон Марказий банки кейинги икки ҳафта ичида икки марта тижорат банкларига коронавирус оқибатида оғир аҳволга тушган аҳоли вакиллари ва тадбиркорлик субъектларига кредит таътили беришга оид тавсиясини эълон қилди.

Айни пайтда¸ ўз кредит фаолиятини Марказий банкдан мустақил тарзда юритиш ваколатига эга тижорат банклари бу тавсияни амалга оширишга ошиқмаëтгани ўзбекистонлик тадбиркорлар эътирозига сабаб бўлмоқда.

ИИВ автотранспорт учун стикер бериш жараёнидаги ажиотаж ва навбатларга аниқ изоҳ бермади

Хусусий автомобил назорат қилинмоқда, 25 март, 2020 (иллюстратив сурат)

АОКА ҳузуридаги штабда Ички ишлар вазири матбуот котиби Шуҳрат Ғиёсов бирифинг ўтказди.

Матбуот котибига мамлакатда автотранспорт воситалари ҳаракатининг чекланиши, тўйлар ва карантин қоидаларига риоя қилиниши бўйича саволлар берилди.

Жумладан, Шохруҳ Ғиёсовга автотранспорт воситалари учун махсус рухсатнома - стикерлар бериш жараёнида кузатилган ажиотаж ва навбатлар ҳақида савол берилди:

"Давлат хизмати агентликларида одамлар тўпланиб ажиотаж ҳосил қилишди, бугун эрталабдан ҳам шундай ҳолат кузатилмоқда. Кўпчиликка рад жавоби бериляпти, биринчи савол нега уларга рад жавоби бериляпти, иккинчи савол шу чекловларни уч-тўрт кун олдин эълон қилса бўлмасмиди?"

Ғиёсов аввалига қайси турдаги транспорт воситаларига стикер берилишини санаб ўтди-да, сўнгра: "Бошқа транспорт воситаларига стикер берилмайди. Давлат хизматлари марказларида тўпланманг, у ердаги ходимларни ва ўзингизни асабингизни бузманг!" деди.

Матбуот котиби навбатларнинг асл сабаби - яъни, бу чекловлар нега бир неча кун олдиндан эълон қилинмади, деган саволга жавоб бермади.

Шунингдек, Ғиёсов хаста одамни шифохонага олиб бориш зарурати туғилса, фуқаролар шахсий автомобилидан фойдаланиши мумкинлиги ва буни ИИВ ходимларига тушунтириши кераклигини айтди.

Ғиёсов билан мулоқотни тўлиқ қуйида томоша қилишингиз мумкин:

Ўзбекистонда 30 мартдан шахсий автомобилда шахсий мақсадда ҳаракатланиш тақиқланди.

Ҳукумат комиссияси қарори билан маълум турдаги автранспорт воситаларига махсус рухсатнома - стикер билан ҳаракатланишга рухсат берилди.

Стикерлар 29 март Давлат хизматлари агентликларида берила бошлади. Ўша кезданоқ, агентликлар олдида автомобили бор кишиларнинг тирбанд навбатлари кузатила бошлади.

Бу навбатлар ва тўсатдан жорий этилган чекловлар ижтимоий тармоқларда кескин эътирозларга сабаб бўлди.

Озодликка келаётган хабарларга кўра, автомобил учун рухсатнома олиш истагида бўлган кишиларнинг навбатлари бугун ҳам давом этмоқда.

Қашқадарёлик 14 яшар бемор COVID-19 билан вилоят юқумли касалликлар шифохонасига ётқизилди

Вирусология илмий текшириш институти клиникаси шифокорларининг илк гуруҳи 14 кунлик давом этган сменани топширди, 29 март, 2020

Ўзбекистонда коронавирус касаллигини юқтириб олган энг сўнгги бемор иккинчи вафот этган марҳум билан мулоқотда бўлган 14 ёшли жияни эканлиги маълум қилинди.

У айни пайтда Қарши шаҳрида жойлашган Қашқадарё вилояти юқумли касалликлар шифохонасида даволанмоқда.

ССВга кўра, беморнинг ҳолати ўрта оғир даражада. Бемор билан мулоқотда бўлган яқинлари ва бошқа фуқаролар қатъий назоратга олинган.

Айни пайтда яна 2 нафар қашқадарёлик бемор Тошкентдаги Вирусология илмий текшириш институти клиникасида даволанмоқда.

30 март ҳолатига кўра, Ўзбекистонда 2 бемор вафот этди, 145 кишида вирус аниқланди.

7 бемор тузалиб, реабилитация марказига ўтказилди.

Барча вилоятлар маркази ва йирик шаҳарлар ёпилган, 25 мартдан кўчада ниқобсиз юриш тақиқланган.

Алоҳида автотранспорт воситаларига махсус рухсатнома билан ҳаракатланишга рухсат берилди, шахсий автомобиллардан шахсий мақсадда фойдаланиш 30 мартдан тақиқланди.

Дунёда вирус юқтирганлар расмий сони эса 725 мингдан, ўлганлар сони эса 34 мингдан ошди. Тузалганлар 152 минг атрофида.

Ота-оналарга карантин пайдида меҳнат таътили бериш низоми қабул қилинди

Мактабларнинг номаълум муддатга ëпилгани ортидан ишловчи ота-оналарнинг танг аҳволда қолгани кузатилмоқда.

Ўзбекистонда мактаб ва мактабгача таълим муассасаларининг коронавирус эпидемияси боис номаълум муддатга ëпиб қўйилиши ортидан боласига қараш учун уйда қолаëтган ота-оналарга меҳнат таътили беришнинг ҳуқуқий асоси ишлаб чиқилди.

Адлия вазирлиги ҳукуматнинг 28 март кунги "Карантинга оид чоралар амал қилиш даврида мактабгача таълим ташкилотлари ва умумтаълим муассасаларининг фаолияти тўхтатилганда мактабгача таълим ташкилотлари тарбияланувчилари ва умумтаълим муассасалари бошланғич синф ўқувчиларининг ота-оналарига йиллик меҳнат таътили беришнинг вақтинчалик тартиби тўғрисидаги низомни тасдиқлаш ҳақида"ги буйруғининг давлат рўйхатидан ўтказилганини билдирди.

30 март куни эълон қилинган расмий изоҳга кўра¸ карантин пайтида боғча тарбияланувчиси ва 1-4-синф ўқувчиларининг ота-она (уларнинг ўрнини босувчи шахс, васий, ҳомий)сига карантин пайтида меҳнат таътили берилиши шарт.

Бундай таътил ходимнинг ўз хоҳишига кўра, таътиллар жадвалидан қатъи назар берилади¸ агар ходим буни истамаса¸ у масофавий ишлашга ўтказилиши ëки иш ҳақи сақланмаган таътилга чиқарилиши мумкин.

«Иш берувчи ходимга аризасида кўрсатилган санадан бошлаб иш ҳақи сақланмаган таътил беришга мажбур, Меҳнат кодексида белгиланган максимал муддат бўйича чекловлар карантин даврида татбиқ қилинмайди”¸ дейилади Адлия вазирлиги расмий изоҳида.

16 мартдан бошлаб Ўзбекистондаги барча таълим муассасаларида таътил эълон қилинди ва номаълум муддатга ëпилди.

Таълим вазирликлари ўқув жараëнини масофавий усулга ўтказишга тайëрланмоқда¸ Ўзбекистондаги қатор телеканалларда мактаб дастури асосида ҳозирланган видеодарслар намойиш этилмоқда.

Айни пайтда¸ мамлакатнинг чекка ҳудудларида электр тақчиллиги ва Интернет йўқлиги боис¸ ҳукуматнинг дарсларни масофавий режимга ўтказиш ҳаракатининг муаммога учраëтгани айтилмоқда.

Хитой коронавирусга қарши кураш учун Ўзбекистонга гуманитар ëрдам юборди

Хитой гуманитар ëрдамини ўзбек ҳарбийлари қабул қилиб олган.

Хитой ҳукумати коронавирусга қарши кураш учун Ўзбекистонга гуманитар ëрдам юборди.

29 март куни Хитой армиясига қарашли ҳарбий учқичда Тошкентга келган 20 тонналик ëрдамни Ўзбекистон Мудофаа вазирлиги расмийлари қабул қилиб олган.

Айтилишича¸ Хитойдан юборилган ëрдам орасида тиббий қўлқоп ва фильтрлик ниқоблар¸ шунингдек тана ҳароратини масофадан туриб ўлчовчи махсус термометрлар бор.

Хитой ҳарбийлари етказган бу тиббий жиҳозлар¸ айтилишича¸ Ўзбекистонда жорий этилган карантин режимини назорат қилаëтган ҳарбийлар¸ ИИВ ва тиббиëт ходимларига тарқатилади.

Февраль ойида Хитой коронавирус ўчоғи бўлиб қолаëтган бир пайтда¸ Ўзбекистон ҳукумати Хитойга айни шундай гуманитар ëрдам юборган эди.

Коронавирус тарқашини деярли тўхтатишга муваффақ бўлган Хитой ҳукумати¸ март ойи охирига келиб¸ жаҳоннинг бу вирус тарқаëтган давлатларига гуманитар ëрдам беришни кучайтира бошлади.

Хитойнинг глобал миқëсдаги иқтисодий-сиëсий мавқеини мустаҳкамлашга қаратилган бундай ëрдам дастури¸ таҳлилчилар томонидан "пандемия дипломатияси" деб аталмоқда.

Масофавий (уйдан) ишлашга оид махсус тартиб тасдиқланди

"Уйда қолинг" акцияси давом этмоқда.

Адлия вазирлигида 28 март куни рўйхатдан ўтган буйруқ билан¸ Ўзбекистонда масофавий ишлашга ўтиш тартиби тасдиқланди.

Бу ҳақда 30 март куни вазирлик ўз Telegram каналида хабар қилди.

Карантинга оид чоралар амал қилиш даврида ходимларни масофавий иш усулида, мослашувчан иш графигида ёки уйда ишлашга ўтказишнинг вақтинчалик тартиби тўғрисидаги низомни тасдиқлаш ҳақида”ги буйруқ билан тасдиқланган низомга кўра, карантин даврида иш берувчи ходимнинг розилиги билан уни масофавий иш усулида, мослашувчан иш жадвалида ёки уйда ишлашга ўтказиши мумкин”¸ дейилади расмий хабарда.

Масофавий¸ яъни уйдан ишлаш тартиби¸ вазирликнинг таъкидлашича¸ биринчи навбатда ҳомиладор аёллар, кексалар, имконияти чекланган шахслар ва сурункали касалликларга чалинган ходимларга қўлланилади.

Ходимнинг масофавий иш усулида, мослашувчан иш жадвалида ёки уйда ишлашга ўтказилиши иш берувчининг буйруғи билан расмийлаштирилади ва бу ҳақда меҳнат шартномасига ўзгартиш киритилади.

Адлия вазирлиги изоҳида масофавий ишлашга ўтганларга иш берувчи томонидан иш учун зарур бўлган жиҳозларнинг берилиши¸ алоқа воситалари ва Интернет билан таъминлаш, ходим шахсий жиҳоз, техника воситаларидан, Интернетдан фойдаланганда харажатларни қоплаш тартиби ҳам меҳнат шартномасида кўрсатилиши лозимлиги айтилган.

Мазкур ишлаш усулига ўтказилган ходимларнинг меҳнат таътили, вақтинча меҳнатга лаёқатсизлик бўйича нафақа олиш ҳамда қонун ҳужжатлари ва жамоа шартномасида назарда тутилган бошқа ҳуқуқлари сақлаб қолинади”¸ дейилади Адлия вазирлиги изоҳида.

Коронавирус тарқалишини тўхтатиш мақсадида Ўзбекистон ҳукумати ҳам аҳолини уйда қолишда рағбатлантиргани ва мамлакатнинг аксар қисмида карантин режими жорий қилингани ортидан аксар давлат ва нодавлат ташкилотлари ўз хохимларини масофавий ишлашга ўтказишга мажбур бўлмоқда.

Расман: Тошкентда етарли даражада озиқ-овқат заҳираси мавжуд

29 мартдаТошкентда одамларнинг катта миқдорда маҳсулотлар харид қилаётгани кузатилган эди.

Тошкентда шаҳар аҳолисини таъминлаш учун етарли даражада озиқ-овқат заҳираси мавжуд. Бу ҳақда пойтахт ҳокимияти 29 март куни кечга яқин маълумот тарқатди.

Қуйида Тошкент ҳокимияти маълумотини тўлиқ келтирамиз:

“Маълумки, 30 мартдан Тошкент шаҳрига фақат махсус рухсатномага эга машиналар кириб чиқиши ва ҳарактланишига рухсат берилди.

Аммо бу шаҳримизга озиқ-овқат ва қишлоқ хўжалиги маҳсулотлари олиб кирилмайди дегани эмас.

Бугун шаҳримизнинг кўплаб бозорлари ва дўконларида қишлоқ хўжалиги маҳсулотларига навбат кузатилди. Бу эса карантин талабларига зиддир.

Шу сабаб аҳолимизга мурожаат қилиб, захирада қишлоқ хўжалиги ва озиқ-овқат маҳсулотлари етарли эканлигини, бозор ва дўконлар бундай маҳсулотлар билан мунтазам таъминланишини маълум қиламиз.

Фақат заруратга кўра кўчага чиқинг, одамлар билан оралиқ масофани сақланг, санитария-гигиена талабларига риоя этинг ва бу билан ўзингиз ҳамда яқинларингиз саломатлигини асранг!” дейилади билдирувда.

29 март куни ижтимоий тармоқларда Тошкентнинг бозорлари ва дўконларида навбатлар пайдо бўлгани ва одамларнинг катта миқдорда маҳсулотлар харид қилаётганига оид суратлар ва видеолар пайдо бўлган эди.

29 март ҳолатига кўра, Ўзбекистонда 144 кишида коронавирус аниқланди. 2 бемор вафот этди, 7 бемор тузалиб, реабилитация марказига ўтказилди.

Прокуратура тадбиркорлардан нархларни оширмаслик тўғрисида кафолат хатлари ёздириб олди

Нархларни асоссиз равишда оширмаслик тўғрисида 40 мингта тушунтириш тадбирлари ўтказилган.

Прокуратура ходимлари 23 мингдан ортиқ тадбиркордан нархларни оширмаслик ҳақида кафолат хати ёздириб олди.

Маҳаллий нашрларнинг 29 мартда ёзишларича, бу ҳақда 28 март куни Тошкентда ўтган брифингда Бош прокуратура ҳузуридаги Иқтисодий жиноятларга қарши курашиш департаменти бошлиғи Дилшод Раҳимов маълум қилди.

Расмий карантин пайтида 215та деҳқон бозори, 167та савдо мажмуаси, дорихоналар, улгуржи савдо базалари ва товар хомашё биржалари прокуратура ҳамда солиқ идораларининг 2604 нафар ходими томонидан кучайтирлган тарзда назорат қилинаётганини ҳам билдирган.

Дилшод Раҳимовга кўра, нархларни асоссиз равишда оширмаслик тўғрисида 40 мингта тушунтириш тадбирлари ўтказилган. 23 мингдан ортиқ тадбиркордан нархларни оширмаслик борасида кафолат хатлари олинган.

Прокуратура томонидан шу кунларда 728та ҳолатда умумий қиймати 2 миллиард сўмга яқин маҳсулотлар асоссиз равишда қиммат нархда сотилгани аниқланган. Прокуратура томонидан айбдорларга нисбатан жазо чоралари қўлланилган.

Пахтачида "коронавирусдан ўлган одам ҳақида ёлғон хабар тарқатган" шахс 30 суткага қамалди

Юқумли касалликлар тўғрисида ёлғон маълумотларни тарқатган шахслар Ўзбекистонда уч йилгача қамалиши мумкин.

Самарқанд вилоятининг Пахтачи туманида яшовчи 43 ёшли А.Ш. “қўшниси коронавирусга чалиниб ўлгани” тўғрисида ёлғон хабар тарқатганликда айбланиб, ўттиз суткага қамалди.

Daryo.uz нашрининг 29 мартда ёзишича, Пахтачи туман маъмурий суди А.Ш.ни Маъмурий жавобгарлик тўғрисидаги кодекснинг 205-моддаси (Фавқулодда ҳолат тартиби шароитида жамоат тартибига тажовуз қилиш) билан айбли деб топган ва 30 сутка қамоқ жазоси белгилаган.

Хабарда таъкидланишича: “фуқаронинг қилмиши ДХХ вилоят бошқармаси ва ИИБ ходимлари томонидан фош этилган”.

Аниқланишича, А.Ш., 25 март куни соат 16:00 да марҳум маҳалладошини "кўп миқдорда спиртли ичимлик истеъмол қилганлиги учун вафот этди" деб эшитган. У, шундан сўнг, ижтимоий тармоқда "Пахтачи тумани “Тома” маҳалласида яшовчи О., исмли шахс коронавирусга чалиниб, кўп миқдорда ароқ ичиб, бугун вафот этганлиги айтилмоқда", деб хабар тарқатган.

26 март куни Адлия вазирлигининг “Ҳуқуқий ахборот” телеграм канали юқумли касаллик ҳақида ёлғон маълумот тарқатганлик учун жиноий жавобгарлик белгилангани ҳақида маълум қилган эди.

Расмий маълумотда айтилишича, “Жиноят, Жиноят-процессуал кодексларига ҳамда Маъмурий жавобгарлик тўғрисидаги кодексга ўзгартиш ва қўшимчалар киритиш ҳақида” Қонун 26 март куни президент томонидан имзоланган.

Ўзгартишларга мувофиқ бундан буён юқумли касалликлар тарқалиши ҳақида ҳақиқатга тўғри келмайдиган маълумотларни нашр қилиш ёки бошқача усулда кўпайтирилган матнда ёки ОАВ, шунингдек, Интернет орқали тарқатганлар БҲМнинг 200 бараваридан (44 млн 600 минг сўмдан) 400 бараваригача (89 млн 200 минг сўм) миқдорда жаримага тортилади.

Бундан ташқари юқумли касалликлар тўғрисида ёлғон маълумотларни тарқатган шахсларга нисбатан 300 соатдан 360 соатгача мажбурий жамоат ишларига, 2 йилдан 3 йилгача ахлоқ тузатиш ишларига жалб этиш, 3 йилгача озодликни чеклаш ёки 3 йилгача озодликдан маҳрум жазолари ҳам белгиланган.

Барча авиақатновлар 30 мартдан бошлаб тўхтатилди

Авиақатновлар 20 апрелгача тўхтатилди.

30 март соат 00:01дан бошлаб 20 апрель соат 00:01га қадар Ўзбекистондаги мавжуд барча авиақатновлар бутунлай тўхтатилди. Бу ҳақда Ташқи ишлар вазирлиги маълум қилди.

Хабарда бундай қарор “Ўзбекистон Республикаси президенти Шавкат Мирзиёевнинг топшириғига мувофиқ, коронавируснинг кириб келиши ва тарқалишини олдини олиш юзасидан чора-тадбирлар дастурини тайёрлаш бўйича республика махсус комиссияси” томонидан қабул қилингани билдирилган.

Аввалроқ республика махсус комиссиясининг қарори билан Ўзбекистонда 30 март эрталабки соат 6 дан 20 апрель тунги соат 12 га қадар мамлакат бўйлаб шахсий машинадан шахсий манфаат йўлида фойдаланиш тақиқланган эди.

Қарорга асосан автотранспорт воситалари давлат хизматлари марказлари томонидан бериладиган махсус рухсатнома (стикер) асосидагина ҳаракатланиши мумкин.

Бугунги кунгача Ўзбекистонда 144 кишида коронавирус аниқланди, 2 бемор вафот этди, 7 бемор тузалиб, реабилитация марказига ўтказилди.

Хитойлик шифокорлар гуруҳининг Ўзбекистонга келиши кутилмоқда

Ўзбекистонда коронавирусга чалинганлардан 11 нафари шифокор экани айтилган.

Хитойлик бир гуруҳ шифокорларнинг 30 март куни Ўзбекистонга келиши кутилмоқда. “Кун уз” нашри Ўзбекистоннинг Пекиндаги элчихонасига таянган ҳолда бу ҳақда хабар тарқатди.

Хабарда айтилишича, хитойлик шифокорлар коронавирусга қарши курашда “ўзбек ҳамкасбларига амалий кўмак кўрсатади”.

Маълумотда шифокорлар сони айтилмаган. Айни пайтда хабарда: “Хитой Халқ Республикаси ҳукумати яқинда 15 кишидан иборат хитойлик шифокорларнинг яна бир гуруҳини Ўзбекистонга юбориш масаласини кўриб чиқмоқда”, деб маълум қилинган.

20 март куни ўтган брифингда Давлат санитария-эпидемиология назорати инспекцияси бошлиғи, давлат бош санитария инспектори Нурмат Отабеков президент Шавкат Мирзиёев хитойлик мутахассисларни махсус рейс билан Ўзбекистонга олиб келиб, профилактика тадбирлари бўйича маслаҳат ва кўмак олиб бўйича топшириқ бергани тўғрисида айтган эди.

Хабарларда Ўзбекистонда коронавирусга қарши курашга 100 мингга яқин тиббиёт ходими жалб этилгани айтилган.

ИИВ: 29 мартга келиб, карантинни бузганлар сони 10 минг 350 нафардан ошди

Аҳоли орасида тушунтириш ишлари олиб борилмоқда, 27 март, 2020

Ички ишлар вазирлиги 29 март, тонгги соат 9 га қадар республика бўйича карантинни бузиш ҳолати жами – 10 минг 350 та бўлганини маълум қилди:

- Тошкент шаҳрида – 1 731 та ҳолат;

- Тошкент вилоятида – 867 та ҳолат;

- Жиззах вилоятида – 975 та ҳолат;

- Бухоро вилоятида – 543 та ҳолат;

- Самарқанд вилоятида – 1 179 та ҳолат;

- Қашқадарё вилоятида – 546 та ҳолат;

- Сурхондарё вилоятида – 678 та ҳолат;

- Хоразм вилоятида – 167 та ҳолат;

- Сирдарё вилоятида – 326 та ҳолат;

- Фарғона вилоятида – 1 386 та ҳолат;

- Навоий вилоятида – 206 та ҳолат;

- Наманган вилоятида – 830 та ҳолат;

- Андижон вилоятида – 576 та ҳолат;

- Қорақалпоғистон Республикасида 340 та ҳолатни ташкил этмоқда.

Карантин қоидаларини бузганлар, асосан ниқобсиз юрганлар, карантин жойидан қочганлар ёки ижтимоий тармоқларда "ваҳима уйғотувчи, асоссиз маълумотни тарқатган"лардир.

Ўзбекистонда карантин қоидаларини бузганлик учун 11 миллион 150 минг сўмгача жарима солиниши мумкин.

29 март ҳолатига кўра, Ўзбекистонда 2 бемор коронавирусдан вафот этди, 133 кишида вирус аниқланди.

7 бемор тузалиб, шифохонадан чиқди.

Вирусни юқтирганлар расмий сони дунё бўйича 667 мингдан, ўлганлар сони эса 30 мингдан, тузалганлар сони 142 мингдан ошди.

Вирусология институти клиникасида COVID-19 беморлари билан ишлаган 1 гуруҳ шифокор сменани топширди

Шифкорлар коронавирусдан тузалган 7 беморни кузатмоқда, 29 март, 2020, Тошкент

29 март куни Вирусология илмий текшириш институти клиникасида коронавирусга чалинган беморларни даволаган бир гуруҳ тиббиёт ходимлари юксак эҳтиром билан кузатилди.

Уларнинг ўрнида тиббиёт ходимларининг навбатдаги гуруҳи иш бошлайди.

Президентнинг “Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб-қувватлашга оид қўшимча чора-тадбирлар тўғрисида”ги қарорга кўра, бу шифокорлар 14 кунлик қўшимча рағбат тўловини оладилар.

Қарорга биноан коронавирус инфекциясидан зарарланган беморлар билан мулоқотда бўладиган, беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт, санитария-эпидемиология хизмати ва бошқа ходимларга 5 миллион сўмдан 25 миллион сўмгача рағбатлантириш тўлови белгиланган.

29 март ҳолатига кўра, Ўзбекистонда 2 бемор коронавирусдан вафот этди, 133 кишида вирус аниқланди.

7 бемор тузалиб, шифохонадан чиқди.

Вирусни юқтирганлар расмий сони дунё бўйича 667 мингдан, ўлганлар сони эса 30 мингдан, тузалганлар сони 142 мингдан ошди.

Янги аниқланган 29 ҳолатнинг 6 таси Умрага борган наманганлик аёл яқинларидан топилди

Умрада бўлиб қайтган наманганлик аёлнинг 5 қариндоши ҳамда унинг яқинда вафот этган онасига қараган ҳамширада коронавирус аниқланди.

Daryo.uz нашри келтирган тафсилотларга кўра, 29 март куни Ўзбекистонда аниқланган 29 та янги ҳолатнинг 6 таси Наманганда.

Наманган вилояти Санитария-эпидемиологик осойишталик маркази бош врачи ўринбосари Давлатали Қосимовга кўра, вилоятда коронавирусга чалинганлар сони 12 нафарга етган.

12 март куни Туркия орқали Умра зиёратига бориб келиб, уй карантинида назоратда бўлган Наманган шаҳрида яшовчи 51 ёшли аёл коронавирус инфекциясига чалинганликда гумон қилиниб, 24 март куни юқумли касалликлар шифохонасига карантин кузатувига ётқизилганди.

Унинг коронавирус инфекциясига чалингани 26 март куни тасдиқланган.

Сўнгра аёлнинг онаси, синглиси, қизи ҳамда неварасида ҳам инфекция аниқланди. Аёлнинг 72 ёшли онаси инфекция юққани аниқланган куни - 27 март тонгда миокард инфаркти оқибатида вафот этгани хабар қилинган.

Бу аёл Умра зиёратидан қайтгач, уни кўргани камида 231 киши уйига келган. 29 март куни тонгда аёлнинг карантинда бўлган яна 5 қариндоши — яна бир синглиси, синглисининг келини, акаси, акасининг рафиқаси, жияни ҳамда унинг онасига тиббий хизмат кўрсатиб келган патронаж ҳамшираси — жами 6 кишида коронавирус инфекцияси аниқланди.

ССВ: Франциядан қайтган бемор билан мулоқотда бўлган шифокор вафот этди

Ўзбекистонда сўнгги 24 соат ичида коронавирус инфекцияси билан касалланганлар сони 16 тага ошиб, 104 нафарга етди.

Бу ҳақда Ўзбекистон Соғлиқни сақлаш вазирлиги 28 март куни хабар берди.

Вазирликка кўра, 28 март куни Франциядан келган илк коронавирус юқтирган аёл билан яқин мулоқотда бўлган 39 ёшли шифокор эркак оламдан ўтган.

"Бугун 39 ёшли 1 нафар эркак беморда ўлим ҳолати қайд этилди. Вафот этган бу бемор Франциядан юртимизга биринчи касалликни олиб келган бемор билан мулоқотда бўлган", дейилади вазирлик 28 март куни эълон қилган хабарда.

Вазирлик хабарида таъкидланишича, шифокор ўзининг коронавирус юқтирганини билган ҳолда уйда даволанишга ҳаракат қилган.

Шу тариқа Ўзбекистонда коронавирусдан ўлганлар иккитага етди.

26 март куни наманганлик 72 ёшли эркак бемор коронавирус инфекцияси ташхиси билан вилоят юқумли касалликлар шифохонасига ётқизилган.

Шу куни унда коронавирус инфекцияси аниқланган ва вафот этганди.

Беморга ушбу инфекция 12 март куни Туркия сафаридан қайтган ва касаллиги тасдиқланиб, карантинга олинган қизидан юққан, деб билдирганди

Давомини ўқинг

Кўрмай қолган бўлсангиз

XS
SM
MD
LG