«Ўзбекистон ҳаво йўллари» миллий авиакомпаниясининг собиқ бош директори Улуғбек Рўзиқулов Ўзбекистон Республикасининг Индонезиядаги фавқулодда ва мухтор элчиси сифатида иш бошлади, деб хабар қилди Kun.uz сайти ўз манбасига таяниб.
Ўзбекистон бош вазири муовини лавозимида ишлаган Улуғбек Рўзиқулов 2017 йилнинг августида 2002 йил июнидан буён авиакомпанияга раҳбарлик қилиб келган Валерий Тяннинг ўрнига авиакомпания бош директори этиб тайинланган эди.
Жорий йил 22 январида Авиакомпания ходими Озодликка Улуғбек Рўзиқулов ўз ихтиёри билан вазифасидан кетганини маълум қилган.
Президент Мирзиёев 2017 нинг 23 августида Улуғбек Рўзиқуловни «Ўзавтосаноат» акциядорлик компанияси бошқаруви раислиги ҳамда бош вазир ўринбосари - Экспорт салоҳиятини ва машинасозлик, автомобиль ва электротехника саноатини ривожлантириш, маҳсулотларни стандартлаштириш масалалари комплексининг раҳбари лавозимидан озод этиш ҳақидаги фармонни имзолаган.
