АҚШнинг 93 ёшли собиқ президенти катта Жорж Буш Хьюстон шаҳридаги касалхонадаги икки ҳафталик муолажадан сўнг уйига қайтди.
АҚШ собиқ президентларининг энг кексаси 22 апрел куни 73 йил бир ёстиққа бош қўйган рафиқаси Барбара Бушнинг дафн маросимидан сўнг касалхонага ётқизилган эди.
"Врачлар унинг тузалиб қолганини айтишди ва у уйга қайтганидан баҳтиёр", деб ёзди Бушнинг вакили Жим МакГраз Twitter саҳифасида.
Ўтган йили шифокорлар Жорж Бушга зотилжам ташхисини қўйишганди. Бироқ, хабарларга кўра, у ўзини яхши ҳис қилмоқда.
Катта Жорж Буш 1989-1993 йилларда АҚШ президенти бўлган.
У АҚШга 2001-2009 йилларда раҳбарлик қилган кичик Жорж Буш ҳамда Флорида штатининг собиқ губернатори, 2016 йилги президентлик пойгасида мағлуб бўлган Жэб Бушнинг отасидир.
