Joriy yilda Tojikistonda turmushga chiqmagan qizlarni uylanish maqsadida o‘g‘irlash holatlari ko‘payib, faqat So‘g‘d viloyatida 7 ta shunday hodisa qayd etilgan.
Tojikiston qonunchiligida qizlarni o‘g‘irlash uchun 8 yildan 12 yilgacha qamoq jazosi nazarda tutilgan.
Besh kun oldin Sӯg‘d viloyatidagi Mastchoh tumanida ushbu mintaqada joylashgan harbiy qismning ikki askari 15 va 17 yashar qizlarni o‘g‘irlab, avtomashina bilan Dushanbe shahriga olib borishga uringan.
Tojikiston ichki ishlar vazirligining ma’lumotiga ko‘ra, militsiya xodimlari Dushanbe yaqinidagi Varzob tumanida o‘g‘rilarni qӯlga olib, qizlarni ota-onalariga qaytargan.
Ushbu manbaga ko‘ra, o‘g‘rilar Mudofaa vazirligi askarlari bo‘lib, qizlarga uylanish maqsadida ularni o‘g‘irlagan.
2016 yili Mastchoh tumanida ayni shunday hodisa yuz berib, harbiy qismdagi bir askar 16 yashar qizni o‘g‘irlab, janubiy Tojikistondagi Mo‘minobod tumaniga olib borgandi.
Ayni damda, Sӯg‘d viloyatidagi ichki ishlar boshqarmasi matbuot kotibi Akbar Sharipovning 30 may kuni davlat televideniyasidagi “Sipar” (Qalqon) dasturida xabar berishicha, 3 yigit mamlakat shimolidagi Zafarobod tumaniga kelib bir qizni o‘g‘irlab Dushanbega olib ketishga uringan.
Uning qo‘shimcha qilishicha, o‘g‘rilardan biri Abdurahmon Rahimiy qizga qarindosh bo‘lib va unga uylanish niyatida bo‘lgan, ammo qiz rozilik bermagan.
Abdurahmon Rahimiy “Sipar” dasturida qaysi maqsad bilan bunday amalga qo‘l urganligini quydagicha shahrlab berdi:
“Men sevgan qizning boshqaga unashtirilishi ortidan ular to‘yini buzish maqsadida qizni o‘g‘irlashni niyat qildim. Uni Zafarobod tumanidan Dushanbega olib kelib, uylanmoqchi edim”-dedi Abdurahmon Rahimiy.
O‘g‘rilar qizni zo‘ravonlik bilan “Mersedes” mashinasiga mindirib, Dushanbe tomon yo‘l olgan. Ammo, Dushanbe yaqinidagi militsiya postida ular qo‘lga olingan.
Abdurahmon Rahimiy va uning ikki sherigi ustidan Jinoyat kodeksining 130- moddasi (“Odam o‘g‘irlash”) bo‘yicha jinoyat ishi ochilgan.
Ushbu modda asosida ayblanuvchilarga 8 yildan 12 yilgacha qamoq jazosi tayinlanishi mumkin.
Turmushga chiqmagan qizlarni ularga uylanish maqsadida o‘g‘irlash udumi Qirg‘iziston va Qozog‘istonda ham mavjud.
Joriy yil may oyida BMT Qirg‘iziston hukumatiga murojaat qilib, kelin o‘g‘irlash amaliyotiga barham berish uchun zarur choralar ko‘rishni va milliy qonunlar hamda mamlakat qo‘shilgan xalqaro shartnomalar bajarilishi kerakligini ta’kidlagan.
